Ես տեղեկություններ ունեմ, որ Ռուսաստանն առհասարակ մտադիր է սահմանափակել Հայաստանից կոնյակի արտահանումը, քանի որ ՌԴ-ն ունի կոնյակի արտադրություն։
Այսինքն հայկական կոնյակի ներմուծման սահմանափակումը կարող է լինել հենց այն առաջին սանկցիաներից մեկը, որը ՌԴ-ն կարող է կիրառել մեր նկատմամբ։ Այս մասին «Փաստինֆոյի» հետ զրույցում ասաց Գործատուների միության նախկին նախագահ Գագիկ Մակարյանը։
«Ինչու հենց կոնյակը, քանի որ կոնյակը Հայաստանի արտահանման ապրանքների առաջին 5-յակում է։ Այսինքն, կոնյակի արտահանման ծավալները էական են։ Հաջորդ քայլը կարող է լինել հանքարդյունաբերական ապրանքների սահմանափակումը»։
Նա ընդգծեց, որ մասնավոր համագործակցության ոլորտում ևս կարող խնդիրներ առաջանալ։
«Ռուսական բիզնեսները, հատկապես խոշորները՝ շատ խելոք լսում են իրենց ղեկավարին, քանի որ այդ ղեկավարները իրենց նկատմամբ էլ կարող են կիրառել սահմանափակումներ կամ ստուգումներ։
Ես արդեն տեղեկություներ ունեմ, որ ռուսական շուկայում գործող հայտնի սուպերմարկետների ցանցերը զգուշացրել են մեր գործարարներին, որ ապրանք իրենցից չեն ձեռք բերելու, սառեցնելու են համագարծակցությունը։ Այսինքն, արդեն չեն թաքցնում, որ նման հրահանգներ ունեն ու սկսել են խնդիրներ ստեղծել մեր տնտեսվարողների համար։
Ակնհայտ է նաև, որ որոշ մարզերում արդեն կա վատ վերաբերմունք հայերի հանդեպ, սա կարող է առավել ընդգրկուն ու խորը բնույթ ստանալ»,- ասել է Մակարյանը։
English
Русский
