Ռաիսիի աշխատակազմն ուղղաթիռի կործանման նոր մանրամասներ է հայտնել

Իրանի նախագահի աշխատակազմի ղեկավար Ղոլամ Հոսեյն Էսմայիլին ուղղաթիռի կործանման նոր մանրամասներ է հայտնել։ Քաղաքական գործչի խոսքով՝ թռիչքի ընթացքում եղանակային պայմանները նորմալ են եղել։

«Դա մառախուղ չէր։ Միգուցե կիրճի խորքում մառախուղ կար, բայց թռիչքի ճանապարհին մառախուղ չի եղել»,- նրա խոսքը մեջբերում է IRNA-ն:

Էսմայիլիի խոսքով՝ օդաչուն հրամայել է ուղեկցող ուղղաթիռներին բարձրանալ ամպերից վեր։ Օդաչուները կատարել են հրամանը։ Դրանից 30 վայրկյան անց ուղղաթիռի անձնակազմը նկատել է նախագահական ուղղաթիռի անհետացումը, որից հետո օդաչուն մի քանի պտույտ է կատարել՝ փորձելով գտնել նախագահին և արտգործնախարարին տեղափոխող ուղղաթիռը։

1,5 րոպե անց հնարավոր չի եղել կապ հաստատել․ արդեն այդ ժամանակ ենթադրվում էր, որ նախագահական ուղղաթիռը կործանվել է։ Այնուհետև կապ է հաստատվել Թավրիզի Ջումա մզկիթի իմամ Սեյեդ Մոհամադ Ալի ալ-Համեշի հետ։ Նա եղել է անհետացած ուղղաթիռում և հայտնել է կործանման մասին։ Նրա հետ կապը պահվել է մահվանը նախորդած մի քանի ժամվա ընթացքում։