«Չեմ զղջում հայհոյանքի համար»․ Վիլեն Գաբրիելյան (տեսանյութ)

«Մանդատը դնելն իմ որոշումն է՝ որպես գիտակից և խելամիտ մարդ, քանի որ իմ պահվածքը վայել չէր ԱԺ պատգամավորին»,- այս մասին «Ֆակտոր»-ի հետ զրույցում նշեց ՔՊ-ական Վիլեն Գաբրիելյանը։ 

Անդրադառնալով հարցին՝ կուսակցությունում քննարկվե՞լ է, թե՞ ոչ այդ հարցը,Գաբրիելյանը նշեց, որ տեղեկություն չունի․ «Բայց, ըստ տրամաբանության, եթե ես լինեի վարչության անդամ և կուսակցական մեր ընկերներից որևէ մեկը նույն վարքը ցուցաբերեր, ես հաստատ կարող էի քննարկել իր հարցը վարչությունում։ Դրա մեջ որևէ վատ բան չկա»։

Անդրադառնալով դիտարկմանը, որ իր ՔՊ-ական գործընկերները լրագրողներին են մեղադրել սադրելու համար, և հարցին, թե արդյո՞ք ինքն էլ իրեն մեղավոր չի համարում, Գաբրիելյանը պատասխանեց․ «Իմ սխալն այն էր, որ ԱԺ պատգամավորին, ալկոհոլի ազդեցության տակ, չի կարելի վեճի բռնվել որևէ մեկի հետ»։

Ճշտող հարցին՝ հայհոյանքի համար չի՞ զղջում, Գաբրիելյանը պատասխանեց․ «Բացարձակ չեմ զղջում հայհոյանքի համար, որովհետև, ըստ էության, իրավիճակը, եթե նայեք և գնահատեք, կհասկանաք, որ հայհոյանքը տեղի է ունեցել ի պատասխան շանտաժի։

Երբ ձեզ ասեին, որ ձեզ ոչ սթափ վիճակում նկարել եմ, վիդեոն կհրապարակեմ, դուք ի՞նչ կասեիք իմ տեղը։ Իհարկե, լավ չէ, որ հայհոյել եմ, բայց չեմ զղջում դրա համար։ Մեղավոր եմ համարում հանրային առումով, զղջում եմ, որ հայհոյանքն այդքան մարդ տեսել է, բայց տվյալ անձի փոխհարաբերությունների տեսանկյունից չեմ զղջում»։