Այսօր՝ հունիսի 13-ին, Այրվածքաբանություն ազգային կենտրոնի վերակենդանացման բաժանմունքում մահացել է Արագածոտնի մարզի բնակիչ, 44-ամյա Կարապետ Ս.-ն։
Ինչպես հայտնում է ֆոտոլրագրող Գագիկ Շամշյանը, վերջինը նշված կենտրոն էր տեղափոխվել հունիսի 7-ին, Երևան-Սևան ավտոճանապարհին գազալցակայանի պայթյունի հետևանքով «ջերմային այրվածք բոցով գլխի, իրանի զույգ վերին և ստորին վերջույթների 1-ին, 2-րդ, 3-րդ և 4-րդ աստիճանի մոտ 60 տոկոս մարմնի մակերես» ախտորոշմամբ։
Ինչպես ավելի վաղ դեպքի վայրից հայտնել էր ֆոտոլրագրողը, հունիսի 6-ին պայթյուն և խոշոր հրդեհ էր տեղի ունեցել Կոտայքի մարզում։ Երևան-Սևան ավտոճանապարհի 2-րդ կմ հատվածում, դեռևս անհայտ հանգամանքներում, գազալցակայանում պայթյուն էր տեղի ունեցել, ինչի հետևանքով խոշոր հրդեհ էր բռնկվել։
Կային վիրավորներ, այրված ու մոխրակույտի վերածված ավտոմեքենաներ, կրակն ու ծուխը տեսանելի էին մի քանի կմ-ից։ Ճանապարհն ամբողջությամբ փակված էր։
Ոստիկանությունն ու քննչական բաժինը պարզել են վիրավորների ինքնությունը։
Նրանք են՝Արագածոտնի մարզի բնակիչ 44-ամյա Կարապետ Սիմոնյանը, Կոտայքի մարզի բնակիչ 33-ամյա Գևորգ Չերքեզյանը, ովքեր «պոլիտրավմա, մարմնի բազմակի շրջանների ջերմային այրվածք» ախտորոշմամբ մարմնական վնասվածքներով տեղափոխվել են Երևանի «Սուրբ Գրիգոր Lուսավուրիչ» բժշկական կենտրոն:
Իսկ Կոտայքի մարզի բնակիչ 23-ամյա Հարութ Խաչատրյանը, Կոտայքի մարզի բնակիչ 17-ամյա Լեո Հայրապետյանը, Կոտայքի մարզի բնակիչ 35-ամյա Մհեր Գևորգյանը, Կոտայքի մարզի բնակիչ 34-ամյա Անդրանիկ Աբրահամյանը և Երևանի բնակիչ 61-ամյա Լևոն Ստեփանյանը «զույգ վերին վերջույթների 1-ին, 2-րդ աստիճանի այրվածք» ախտորոշմամբ տեղափոխվել են «Աբովյան» բժշկական կենտրոն, որոնցից մի մասն այնուհետև տեղափոխվել է Այրվածքաբանության և մաշկաբանության ազգային կենտրոն: