Կադիրովի անչափահաս որդիները կմեկնեն Ուկրաինա՝ առաջնագիծ

Չեչնիայի ղեկավար Ռամզան Կադիրովի երեք որդիները շուտով կմեկնեն Ուկրաինայում հատուկ ռազմական գործողության գոտի։ Այս մասին Կադիրովը գրել է Telegram-ի իր ալիքում։

Խոսքը 16-ամյա Ախմատի, 15-ամյա Էլիի և 14-ամյա Ադամի մասին է: Կադիրովն ընդգծել է, որ անչափահաս տարիքը չպետք է խանգարի հայրենիքի պաշտպանների մարզմանը:

Չեչնիայի ղեկավարը մանրամասնել է, որ որդիների ռազմական պատրաստությունը սկսել է շատ վաղ հասակից:

«Ես միշտ հավատացել եմ, որ ցանկացած հոր գլխավոր նպատակը որդիների մեջ բարեպաշտություն սերմանելն ու նրանց ընտանիքը, ժողովրդին, Հայրենիքը պաշտպանել սովորեցնելն է։ Եթե խաղաղություն ես ուզում, պատրաստվիր պատերազմի։

Ախմատը, Էլին և Ադամը պատրաստ են օգտագործել իրենց հմտությունները հատուկ ռազմական գործողության գոտում: Եվ ես չեմ կատակում: Ժամանակն է իրենց իսկական կռվի մեջ դրսևորեն, և դա նրանց ցանկությունն է, ես միայն ողջունում եմ։ Շուտով նրանք կգնան առաջնագիծ ու կլինեն շփման գծի ամենաբարդ հատվածներում»,- գրել է Կադիրովը։