Խոշոր ավտովթար է տեղի ունեցել Կոտայքի մարզում

Երեկ՝ հուլիսի 6-ին, խոշոր ավտովթար է տեղի ունեցել Կոտայքի մարզում: Ժամը 19:00-ի սահմաններում Զովունի-Եղվարդ ավտոճանապարհին՝ Զովունի գյուղի վարչական տարածքում՝ «Զով Գարդեն» ռեստորանային համալիրի հարևանությամբ բախվել են Երևանի բնակիչ 61-ամյա Վահան Եղիազարյանի վարած «Honda» մակնիշի և Կոտայքի մարզի բնակիչ 25-ամյա Կամո Մախմուրյանի վարած  «Toyota Camry» մակնիշի ավտոմեքենաները:  

Ինչպես դեպքի վայրից հայտնում է ֆոտոլրագրող Գագիկ Շամշյանը, վթարի հետևանքով 2 վարորդներն ու «Toyota»-ի ուղևոր, Արագածոտնի մարզի բնակիչ 21-ամյա Ալիսա Մախմուրյանը մարմնական վնասվածքներով տեղափոխվել են Երևանի «Արմենիա» բժշկական կենտրոն:

Վիրավորներին առաջինը օգնության են հասել քաղաքացիները, «Զով Գարդեն» ռեստորանային համալիրի աշխատակիցները և օպերատիվորեն ժամանած շտապօգնության բժիշկների հերթապահ խմբերը:

Ֆոտոլրագրողը հայտնում է, որ բախման հետևանքով «Toyota»-ն բախվել է ճանապարհին տեղադրված բետոնե էլեկտրասյանը, կոտրել այն, իսկ «Honda»-ն դուրս է եկել երթևեկելի գոտուց և հայտնվել դաշտում:

Դեպքի վայրում հավաքված մի քանի քաղաքացիներ ասում էին, որ վթարի մեղավորը «Toyota»-ի վարորդն է, ով վազանց է կատարել, ստեղծել է վթարային իրավիճակ, ինչն էլ դարձել է վթարի պատճառ, սակայն ոստիկանները, պարեկներն ու քննիչները այդ անձանց հայտնած տեղեկությունները հալած յուղի նման չեն ընդունում, և կան կասկածներ, որ նրանք գույները խտացնում են: