Լուսանկարներ՝ «Կանանց գաղութից»․ Աննա Հակոբյանը պատասխանատվության կենթարկվի՞

Լուսանկարներ՝ «Կանանց գաղութից»․ Աննա Հակոբյանը պատասխանատվության կենթարկվի՞

ՀՀ վարչապետի կինը՝ Աննա Հակոբյանը, նախօրեին այցելել էր «Աբովյան» քրեակատարողական հիմնարկ, ներկա գտնվել «Հանուն ազատության» իրավական հասարակական կազմակերպության կազմակերպած տոնական համերգին։

Մի կողմ թողնելով այն հանգամանքը, որ քովիդով հիվանդ ամուսնու հետ շփվելուց հետո Հակոբյանը չի մեկուսացել, նա ֆեյսբուքյան իր էջում տեղադրել է կին դատապարտյալների լուսանկարներ և տեսանյութ, որը բուռն քննադատության է արժանացել օգտատերերի կողմից։

«Աննա Հակոբյանը դատապարտյալների լուսանկարները հրապարակելու իրավունք չուներ»,- գրում են քաղաքացիները։

Հարկ է նշել, որ հրապարակված լուսանկարում դատապարտյալ կանանց հագուստին փակցված են նրանց տվյալները՝ ազգանունը, անվան և հայրանվան սկզբնատառերը, որոնցով ևս հնարավոր է նույնականացնել։

Տվյալների պաշտպանության փորձագետ Գևորգ Հայրապետյանը Oragir.News-ի հետ զրույցում ասաց, որ չենք կարող այս հարցի պատասխանը միայն լուսանկարների և տեսանյութի հրապարակումով ստանալ։

«Անձնական տվյալների պաշտպանությունը տվյալների հետ ճիշտ վարվելու մասին է, օրենքով որոշ կանոններ կան դրա համար։ Ու հասկանալու համար, թե այդ կանոններից որևէ մեկը խախտված է, թե չէ, պետք է կոնկրետ դեպքը իր հանգամանքներով ուսումնասիրել ու համադրել այդ կանոնների հետ։

Օրինականության սկզբունք կա, համաչափության սկզբունք կա, իրավական հիմքի առկայության սկզբունք կա և այլն։ Կարծում եմ՝ առանց պատշաճ քննության որևէ փորձագետ չի կարող ասել»,- նշեց մասնագետը։

Հարցին, եթե դատապարտյալ կանանցից որևէ մեկը բողոքի իր լուսանկարը և անձնական տվյալները, տվյալ դեպքում՝ անուն-ազգանունը հրապարակելու համար, ասի, որ իր համաձայնությունը չի եղել, ի՞նչ գործընթաց կարող է հետևել սրան, Գևորգ Հայրապետյանը պատասխանեց․

«Այս դեպքում մենք ունենք անձնական տվյալների պաշտպանության լիազոր մարմին։ Եթե համապատասխան լիազոր մարմինը նման բողոք ստանա, ապա դիմումի հիման վրա վարչական վարույթի շրջանակում պետք է քննի և վերջում որոշում կայացնի՝ եղել է համաձայնություն, թե ոչ, արդյոք մարդու անձնական տվյալները մշակվե՞լ են օրենքի բոլոր պահանջների պահպանմամբ, թե՞ առնվազն մի պահանջի խախտում է եղել։ Եթե պարզվի, որ խախտում է եղել, պատասխանատվությունը կախված է դիմումի պահանջից և այն խախտումից, որը կգտնեն»,- ասաց մեր զրուցակիցը, ապա շեշտեց՝ առանց տվյալների մշակման՝ կոնկրետ դեպքը պատշաճ քննարկելու և առանց անձնական տվյալների մշակման կանոնների հետ համադրելու՝ հնարավոր չէ պնդել, որ կա խախտում։ Դա կարող է իրականացվել միայն համապատասխան քննությունից հետո։

Oragir.News-ը կապ հաստատեց ՀՀ արդարադատության նախարարության անձնական տվյալների պաշտպանության գործակալություն, որտեղից խնդրեցին գրավոր հարցմանը կից տվյալ լուսանկարներն ու տեսանյութն ուղարկել, կուսումնասիրեն և կպատասխանեն։

Oragir.News-ը զանգահարեց նաև Աննա Հակոբյանի ֆեյսբուքյան էջում տեղադրված հեռախոսահամարին, բայց այն ինչպես միշտ անհասանելի էր։