Զինված ուժերում կորոնավիրուսի որևէ դեպք չի գրանցվել․ Սահակ Օհանյան

Ժամը 19։00-ի դրությամբ Զինված ուժերում կորոնավիրուսի որեւէ դեպք չի գրանցվել։ Այս մասին այսօր ՀՀ կառավարության մամուլի կենտրոնում լրագրողների հետ հանդիպմանն ասաց ՀՀ ԶՈՒ ռազմաբժշկական վարչության պետ Սահակ Օհանյանը։

«Ժամը 19։00-ի դրությամբ որևիցե դեպք չունենք։ Շատ խիստ ենք ամեն ինչի նկատմամբ, շատ խիստ վերահսկում ենք, և յուրաքանչյուր ահազանգի դեպքում պատրաստ ենք շատ արագ կատարել մեր առջև դրված խնդիրները»,- ընդգծեց Օհանյանը։

Նրա խոսքով՝ զորամասերում արգելվել են ժամկետային զինծառայողներին տրամադրվող բոլոր տեսակի արձակուրդները, միայն օրենքով սահմանված արձակուրդի տեսակն է թույլատրվում՝ մերձավորի թաղմանը կամ հարսանիքին մասնակցելու համար:

«Բոլոր զորամիավորումներում և զորամասերում բժշկական ծառայությունն անցավ ուժեղացված աշխատանքային իրավիճակի և, ի լրումն զինված ուժերում կիրառվող միջոցառումների, կրկնապատկվեցին այն ջանքերը, որոնք ամենօրյա գործողությունների ընթացքում իրականացնում է բժշկական ծառայությունը։ Զորամասերում արգելվեց ժամկետային զինծառայողների արձակուրդների տրամադրումը՝ բոլոր կարգի արձակուրդները՝ ներառյալ վերականգնողական արձակուրդները։ Թույլատվեց միայն օրենքով սահմանված կարգով մեկ տեսակ արձակուրդ՝ մերձավորների մահվան կամ հարսանիքի կապակցությամբ արձակուրդ»,- ասաց Օհանյանը։

Անդրադառնալով զորակոչը հետաձգելու վերաբերյալ հարցին, Օհանյանն ասաց, որ դրա վերաբերյալ համապատասխան ղեկավարները որոշում կկայացնեն եւ երբ ժամանակը գա՝ հանրությանը կիրազեկեն։