Ուզում եմ ձեզ մի պատմություն պատմել։ 1998-ին վարչապետ Վազգեն Սարգսյանը հրավիրում է ռազմական կոլեգիայի նիստ։ Ես այն ժամանակ կորպուսի հրամանատար էի, միակը, որ ընդգրկված էր կոլեգիայում։ Վեց մարդ կար այդտեղ։ Նա մեզ մի հարց տվեց։ Ասաց՝ համաձա՞յն եք, որ Արցախը լինի Ադրբեջանի կազմում։
Ով կողմ է, թող ձեռք բարձրացնի։ Վեցից ոչ մեկ ձեռք չբարձրացրեց։ Այս մասին քիչ առաջ Ֆրանսիայի հրապարակում կայացած հանրահավաքին իր ելույթում ասաց ԶՈՒ ԳՇ նախկին պետ Յուրի Խաչատուրովը։
«Հետո արդեն հաջորդ հարցը տվեց՝ ուզո՞ւմ եք, որ Արցախն անկախ լինի։ Բոլոր վեցը ձեռք բարձրացրեցին։ Դրանից հետո նա ասաց՝ հիմա ես գիտեմ ինչ եմ անելու։ Դրանից երկու ժամ հետո նախագահը հրաարական տվեց։ Տառացիորեն երկու ժամ հետո»,-ասաց Խաչատուրովը։
«Հիմա, այսօր մենք պատերազմ չենք ուզում։ Մենք ուզում ենք, որ մեզ հարգեն։ Հասարակ հարց ենք տալիս այդ նախարարներին ու մյուսներին՝ համաձա՞յն եք, որ Արցախը լինի Ադրբեջանի կազմում։ Ասում են, գիտե՞ք, չենք կարող այդ հարցին պատասխանել։ Ես հասկանում եմ, որ դուք չեք կարող այնպես անել, որ Արցախը չլինի Ադրբեջանի կազմում, բայց գոնե ասեք, որ չեք ուզում, որ Արցախը լինի Ադրբեջանի կազմում»,- հավելեց նա։
Հիշեցնենք՝ «Հայաստան» և «Պատիվ ունեմ» խմբակցությունների նախաձեռնած ԱԺ արտահերթ նիստը տապալվեց՝ քվորում չլինելու պատճառով, իշխող ՔՊ-ն չէր ներկայացել նիստին:
English
Русский
