Այսօր՝ հունիսի 6-ին, արտակարգ իրավիճակ է ստեղծվել Երևանում: Ժամը 19:00-ի սահմաններում ՀՀ ներքին գործերի նախարարության փրկարար ծառայության 9-11 ճգնաժամային կառավարման ազգային կենտրոն ահազանգ է ստացվել, որ կրակ և ծուխ է նկատվում Հրազդանի կիրճում՝ Միջազգային էներգետիկ կորպորացիա Երևան-1 ՀԷԿ-ում:
Ինչպես դեպքի վայրից հայտնում է ֆոտոլրագրող Գագիկ Շամշյանը, օպերատիվորեն ժամանել են Երևանի հրշեջ-փրկարարական ջոկատներից 7 մարտական հաշվարկ:
Մինչ հրշեջների ժամանումը՝ տանիքում առաջացած կրակի դեմ փորձել են պայքարել ՀԷԿ-ի աշխատակիցները և հրշեջների ժամանումից հետո հրշեջները կանխել են կրակի տարածքումը և մեկուսացրել այն:
Այս պահին հրշեջները ՀԷԿ-ի տարածքում ծխապատ բավականին մեծ հատվածներում որոնողական աշխատանքներ են կատարում՝ կրակի օջախներ հայտնաբերելու ուղղությամբ:
Հրդեհի հետևանքով մայրաքաղաքի որոշ հատվածներում հովհարային անջատումներ են տեղի ունեցել:
Հրդեհի հետևանքով, ըստ նախնական տեղեկությունների, բարեբախտաբար տուժածներ չկան:
English
Русский
