Արտակարգ դեպք է տեղի ունեցել Երևանում

Այսօր՝ փետրվարի 1-ին, արտակարգ դեպք է տեղի ունեցել Երևանում։ Ժամը 17։50-ի սահմաններում ՀՀ Ներքին գործերի նախարարության փրկարար ծառայության 9-11 ճգնաժամային կառավարման ազգային  կենտրոն ահազանգ է ստացվել, որ Բագրևանդի թիվ 5/5 հասցեում գտնվող ավտոլվացման կետի տանիքը փլուզվել է ավտոմեքենայի վրա։

Ինչպես հայտնում է ֆոտոլրագրող Գագիկ Շամշյանը, դեպքի վայր են ժամանել ՓԾ հատուկ նշանակության փրկարարական աշխատանքների իրականացման կենտրոնի հերթապահ խումբը։

Օպերատիվորեն ժամանել են նաև ՀՀ ՆԳՆ ոստիկանության Պարեկային ծառայության Երևան քաղաքի գնդի 1-ին գումարտակի 3-րդ վաշտի պարեկները՝ գումարտակի հրամանտար Արամ Դադոյանի և վաշտի հրամանատար Գևորգ Թորոսյանի գլխավորությամբ։

Պարզվել է, որ ձյան ծանրության հետևանքով տանիքը փլուզվել է և ընկել այնտեղ կայանված Mazda մակնիշի ավտոմեքենայի վրա։

Տարածքը սահմանազատել են նույն վաշտի ավագ պարեկ Սոս Սերոբյանն ու կրտսեր պարեկ Էդիկ Առաքելյանը։

Ըստ նախնական տեղեկությունների բարեբախտաբար տուժածներ չկան։