Ավտովթար է տեղի ունեցել Կոտայքի մարզում

Այսօր՝ հուլիսի 18-ին, ավտովթար է տեղի ունեցել Կոտայքի մարզում: Ժամը 17:50-ի սահմաններում Կոտայքի մարզի բնակիչ 42-ամյա Կարեն Ներսեսյանը իր վարած «Hyundai Elantra» մակնիշի ավտոմեքենայով Երևան-Սևան ավտոճանապարհի Աբովյանի վարչական տարածքում գործող «Լուսաբաց» ռեստորանային համալիրի տարածքում բախվել է 34-ամյա Ասքանազ Վանեսյանին պատկանող կայանված  «Opel» մակնիշի ավտոմեքենային, ապա առաջ է ընթացել և բախվել «Լուսաբաց» ռեստորանային համալիրի շինության պատին: 

Ինչպես դեպքի վայրից հայտնում է ֆոտոլրագրող Գագիկ Շամշյանը, վթարի հետևանքով 1 հոգի մարմնական վնասվածքներով տեղափոխվել է «Աբովյան» բժշկական կենտրոն:

Դեպքի վայրում «Hyundai»-ի վարորդը, ով զրկված է եղել ավտոմեքենա վարելու իրավունքից, և Աբովյանում հայտնի է «Նիվիստ Եթո» մականվամբ, պարեկներին հայտնել է, որ վթարի պատճառը եղել է «Chevrolet»-ի վարորդի կողմից վթարային իրավիճակ ստեղծելը, սակայն «Chevrolet»-ի վարորդը հակառակն է պնդել, ասելով, որ ինքը ոչ մի վթարային իրավիճակ չի ստեղծել:

Վարորդները ենթարկվել են սթափության փորձաքննության, եղել են սթափ:

Քննչական բաժինը պարզում է վիրավորի ինքնությունը:

Գ. Շամշյանի տեղեկություններով՝ «Hyundai»-ի վարորդի նկատմամբ հնարավոր է առանձին քրեական վարույթ նախաձեռնվի. վարորդական իրավունքից զրկված լինելով նա չպետք է մեքենա վարեր: