Աշտարակի «Գայի պոստի» մոտ «Nissan»-ը բախվել է կայանված «BMW»-ին․ ՖՈՏՈ

Երեկ՝ հուլիսի 13-ին, ավտովթար է տեղի ունեցել Արագածոտնի մարզում։

Ժամը 19:00-ի սահմաններում Արագածոտնի մարզի բնակիչ 48-ամյա Գրիգոր Պ.-ն իր վարած «Nissan» մակնիշի ավտոմեքենայով Երևան-Գյումրի 17 կմ հատվածում, դեպի Երևան ընթանալիս, ժողովրդին հայտնի Աշտարակի նախկին «Գայի պոստի» հարևանությամբ, դեռևս անհայտ հանգամանքներում դուրս է եկել ճանապարհի երթևեկելի գոտուց և բախվել ճամփեզրի թույլատրելի հատվածում կայանված՝ Կոտայքի մարզի բնակիչ 37-ամյա Ռուբեն Ճ-ին պատկանող «BMW» մակնիշի ավտոմեքենային։

Ինչպես դեպքի վայրից հայտնում է ֆոտոլրագրող Գագիկ Շամշյանը, բախման հետևանքով «Nissan»-ը դուրս է եկել երթևեկելի գոտուց և հայտնվել դաշտում, «BMW»-ն էլ բախվել է ծառերին։

Վթարի հետևանքով 2 վարորդներն ու BMW-ի ուղևորը մարմնական վնասվածքներով տեղափոխվել են Արմենիա բժշկական կենտրոն։

Վիրավորներին առաջինն օգնության են հասել քաղաքացիները և օպերատիվորեն ժամանած Աշտարակ բժշկական կենտրոնի շտապօգնության բժիշկների հերթապահ խումբը։

Վթարի փաստով քննչական բաժնում նախաձեռնվել է քրեական վարույթ որտեղ էլ պարզում են հիվանդանոց տեղափոխված վիրավոր ուղևորի ինքնությունը։