«Նուբարաշենի» հոգեբուժարանում սպանել են դերասանուհի Շուշաննա Թովմասյանի եղբորը․ ՖՈՏՈ

Shamshyan.com-ը գրում է․ Այսօր՝ նոյեմբերի 15-ին, սպանություն է տեղի ունեցել Երևանում։ Ժամը 14։15-ի սահմաններում ՀՀ ներքին գործերի նախարարության ոստիկանության քրեական ոստիկանության գլխավոր վարչությունում, նույն վարչության Երևանի քրեական ոստիկանության վարչությունում օպերատիվ տեղեկություններ են ստացվել, որ «Նուբարաշեն» հոգեկան առողջության կենտրոնում, ժողովրդին ավելի շատ հայտնի «Սովետաշենի հոգեբուժարանում» սպանություն է տեղի ունեցել։

Մինչ դեպքի վայր կժամանեին քրեական ոստիկանները՝ Երևանի 1-03 շտապօգնությունից ահազանգ  է ստացվում ոստիկանության Նուբարաշենի բաժին, որ շտապօգնության բժիշկների հերթապահ խումբը «ծայրահեղ ծանր» ախտորոշմամբ «Նուբարաշեն» հոգեկան առողջության կենտրոնից հիվանդանոց է տեղափոխել դանակահարված քաղաքացու, ով գիտակցության չգալով մահացել է։

Դեպքի վայրում քրեական ոստիկանները պարզել են, որ մահացածը 37-ամյա Արման Թովմասյանն է։

Դեպքի վայրում հայտնաբերվել են արնանման հետքեր և Երևանի քրեական ոստիկանների օպերատիվ գործողությունների շնորհիվ կասկածյալը, ով հոգեբուժարանից փորձում էր դիմել փախուստի, հետապնդվել, բռնվել ու տեղափոխվել է ոստիկանության Նուբարաշենի բաժին, որտեղից էլ, ինչպես նաև հանցագործության գործիք հանդիսացող դանակը, ներկայացվել է ՀՀ քննչական կոմիտեի Երևան քաղաքի քննչական վարչության Էրեբունի և Նուբարաշեն վարչական շրջանների քննչական բաժին։

Գ․ Շամշյանի տեղեկություններով՝ սպանվածը նախկինում  դանակահարության համար եղել է դատապարտված, ում նկատմամբ դատարանի կողմից կայացվել է որոշում հարկադիր բուժման համար և նրան տեղափոխել էին «Նուբարաշեն» հոգեկան առողջության կենտրոն, իսկ նրան այսօր դանակի 4 հարվածով սպանածը Երևանի բնակիչ 35-ամյա Հայկ Ազիզյանն է, ով ժամանակին քրեորեն պատժելի արարք կատարելու համար դատարանի որոշմամբ հարկադիր բուժում է ստացել «Նուբարաշեն» հոգեկան առողջության կենտրոն։

Մինչ քրեական ոստիկաններն ու էրեբունու քննիչները դեպքի վարում աշխատում էին, ՀՀ ՆԳՆ ոստիկանության համայնքային ոստիկանության գլխավոր վարչության Նուբարաշենի բաժնի նորաթուխ պետը, ով ավելի շատ հայտնի է այստեղ-այնտեղ խոսելով, թե իր թիկունքին կանգնած է ոստիկանության բարձրաստիճան պաշտոնյա, չի բարեհաճել անգամ կաբինետից դուրս գալ  և միայն քրեական ոստիկանության աշխատակիցների հորդորից հետո է բարեհաճել գալ դեպքի վայր, այն էլ երբ արդեն քրեական ոստիկանները վնասազերծել էին սպանություն կատարողին ու  քննիչներն էլ ավարտել էին դեպքի վայրի զննությունը։ Իսկ որ նուբարաշենում ավելացել է  հանցագործությունների թիվը, դրա մեղավորը ներկայիս բաժնի պետ Կ․ Հովհաննիսյանն է։ Ներքին գործերի նախարարն ու ՀՀ ՆԳՆ ոստիկանության պետը կարող էին ավելի բանիմաց սպայի նշանակել բաժնի պետ, որ բարձր կպահեր համակարգի պատիվը, այլ ոչ թե նշանակեին մեկին, ով անգամ անչափահասների բաժանմունքի պետ աշխատած ժամանակ չի փայլել իր գործողություներով։