«Նա արտառոց համարձակ էր»․ մանրամասներ Գյումրիում կախված անչափաս տղայի դեպքից

Aravot.am-ը գրում է.

 Գյումրու Տիգրան Մեծ փողոցի վրա գտնվող բնակարաններից մեկում՝ իր պապի դատարկ տանը,  2005 թվականին ծնված տղա երեխա է կախվել, որին հայտնաբերել է հայրը։

ՀՀ դատախազության լրատվական ծառայությունից  աղբյուրին տեղեկացրեցին, որ  հարուցվել է Քրեական գործ՝ ՀՀ քրեական օրենսգրքի 110 հոդվածի հատկանիշներով, կատարվում է նախաքննություն։ Դատաբժշկի կողմից մարմնական վնասվածքներ չեն ֆիքսվել,  տղան որևէ գրություն  չի թողել։

Պատճառները պարզելու նպատակով տարվում են անհրաժեշտ քննչական և  օպերատիվ-հետախուզական աշխատանքներ։ Հիշեցնենք, որ տղան Գյումրու քաղաքապետարանում առևտրի բաժնի պետի պաշտոնը զբաղեցրած  Կարուշ Չիլինգարյանի թոռն է ։
Մեզ հետ կապ է հաստատել նաև նրա ուսուցիչներից մեկը, որի բնութագրմամբ՝ տղան արտառոց համարձակ էր, նա անհատականություն էր, յուրահատուկ նաև իր արտաքին տեսքով։

Ուսուցիչները շոկի մեջ են, չեն ուզում հավատալ, որ նա կարող էր գնալ այդ քայլին, քանի որ երբեք չէր ընկճվում, պատրաստակամ էր բոլորին օգնելու։ Դպրոցի տնօրենը պատմում է, որ մեկ էլ գալիս էր, թե ինչով օգնեմ դպրոցին։

«Չափից ավելի ակտիվ էր, դպրոցը վերանորոգելուց եկավ, գույքը ստանալուց նույնպես, թե ինչով օգնեմ։ Շատ պատրաստակամ էր։ Մարդկային, պատրաստակամ տեսակ էր, ջենթլմեն բառը իր համար էր ասված, եթե տեսներ որևէ մեկը  դպրոց պիտի մտներ, մեկ էլ ջենթլմենի պես դուռը կբացեր ․․․ Ժպտերես, խարիզմատիկ երեխա էր։

Կես մարդ եմ դարձել, էնքան մտահոգ եմ, չեմ հասկանում ինչի պիտի նման քայլ աներ, ինքը վառ անհատականություն էր»,-ասում է տնօրենը։ Նրանք երկու եղբայր են, իրենից փոքր եղբայր ունի։ Ի դեպ, նրա ինստագրամյան էջում որպես գլխավոր՝  սև է լուսանկար է տեղադրված, որը փոխել է երկու օր առաջ։