Նոր մանրամասներ «Մեյմանդարի» շուկայի սպանությունից․ Գործը բացահայտվել է․ ՏԵՍԱՆՅՈՒԹ

SHAMSHYAN.com-ի տեղեկություներով՝ երեկ հունվարի 15-ին, ՀՀ ներքին գործերի նախարարության Ոստիկանության քրեական ոստիկանության գլխավոր վարչության, Ոստիկանության Արմավիրի մարզային վարչության, Ոստիկանության Վաղարշապատի բաժնի ծառայողները տաք հետքերով բացահայտել են նույն օրը Արմավիրի մարզի՝ ժողովրդին հայտնի «Մեյմանդարի» շուկայում տեղի ունեցած սպանությունը։ 

Ինչպես հայտնում է ֆոտոլրագրող Գագիկ Շամշյանը, մինչ դատաբժիշկը սպանության վայրում աշխատում էր, Վաղարշապատի ոստիկանությունում օպերատիվ տեղեկություններ են ստացվում, որ սպանությունը կատարած անձը դեպքի վայրից դիմել է փախուստի ու գտնվում է Երևանում։ 

Ոստիկանության օպերատիվ խմբերը ուղևորվում են Երևան ու արդեն Գրիգոր Լուսավորիչ փողոցում հայտնաբերում են կասկածյալին, ով տեղափոխվում է ՀՀ ՆԳՆ Ոստիկանության Վաղարշապատի բաժին, որտեղից էլ ներկայացվում է Հայաստանի քննչական կոմիտեի Արմավիրի մարզային քննչական վարչության Վաղարշապատի քննչական բաժին։

Արմավիրի մարզի ոստիկանները, քննիչներն ու դատախազության աշխատակիցները պարզել են, որ սպանվածը Լոռու մարզի բնակիչ 50-ամյա Սարգիս Ա․-ն է, իսկ վիրավորը Լոռու մարզի բնակիչ 29-ամյա Արթուր Հ․-ն։ Սպանությունը կատարելու կասկածանքով հայտնաբերված ու քննչական բաժին ներկայացվածն էլ Արմավիրի մարզի գյուղերից մեկի բնակիչ 56-ամյա Անդրանիկ Կ․-ն է։

Ըստ նախնական տեղեկությունների՝ սպանությունը տեղի է ունեցել գյուղմթերքի շուկայում կենցաղային հարցերի շուրջ ծագած վիճաբանության ժամանակ։ 

Գ․ Շամշյանի տեղեկություններով՝ Անդրանիկ Կ․-ն քննիչի որոշմամբ ձերբակալվել է։ 

Պարզվել է նաև, որ սպանության վայրում հայտնաբերված խոհանոցային դանակը հանցագործության գործիքն է եղել։