Հայաստանի առաջատար բռնցքամարտիկ, Տոկիոյի Օլիմպիական խաղերի բրոնզե մեդալակիր, աշխարհի եռակի բրոնզե մեդալակիր Հովհաննես Բաչկովը երրորդ անգամ նվաճել է Եվրոպայի չեմպիոնի տիտղոսը:
Հաղթանակից հետո Բաչկովը Երեւանից վերադարձել է հայրենի Գյումրի քաղաք, որտեղ էլ մեծ ոգեւորությամբ ու ջերմ շնորհավորանքներով են դիմավորել Եվրոպայի եռակի չեմպիոնին: Հանդիպման ժամանակ Բաչկովը պատասխանել է նաեւ լրագրողների հարցերին:
«Հայկական ժամանակ»-ի՝ Գյումրու թղթակցի փոխանցմամբ՝ Բաչկովը հայտնել է, որ անչափ ուրախ է եւ կամենում է միայն շնորհակալական խոսքեր ասել բոլոր նրանց, ովքեր աջակցել են իրեն: «Առանց մեր ժողովրդի աջակցության, առանց մեր մարզիչների՝ հաստատ այս արդյունքը չէր լինի: Այս հաղթանակը միայն իմը չէ, մեր ողջ հայ ազգինն է»,- արձանագրել է մարզիկը:
Վերջինս, խոսելով լավ մրցաշար անցկացնելու ու վստահ հաղթանակ տոնելու մասին, նշել է, որ դա լուրջ աշխատանքի ու տքնաջանության արդյունքում է հաջողվել: «4-5 օր էր մնացել մրցաշարի մեկնարկին, այդ ժամանակ վերջնական որոշում կայացվեց, որ ես պետք է մասնակցեմ: Վնասվածք ունեի, ու մտավախությունը մեծ էր, որ չեմ կարողանա, դա կխանգարի: Ձեռքիս ոսկորը կոտրված է, պայմանավորվել էի, որ վիրահատություն լինի, հետո մասնակցեմ, բայց թուրք մրցակից ունեի, որը համարվում էր այս մրցաշարի ֆավորիտը, ու շատ հավանական էր, որ հենց ինքն էլ դառնար Եվրոպայի չեմպիոն, եւ Թուրքիայի դրոշը ծածանվեր մեր երկրում, դրա համար որոշեցի մասնակցել»,- ասել է նա:
Բաչկովը նաեւ հավելել է՝ ցավալին այն էր, որ իր մասնակցության հայտից հետո թուրք բռնցքամարտիկին հանել են ցուցակից, նրա փոխարեն մեկ ուրիշին ներկայացրել:
Խոսելով իր հաղթանակների մասին՝ մարզիկը նկատել է՝ դրանք դժվար չեն տրվում, մինչեւ այդ տարվող աշխատանքն ու համառ ջանքերն են դժվարություն պահանջում: «Հաղթանակից հետո ամեն ինչ այնքա՜ն հեշտ է թվում»,- շեշտել է չեմպիոնը:
Հարցադրմանը՝ տարբերություն կա՞ր արտերկրում եւ Հայաստանում ներկայանալու մեջ, Բաչկովն ասել է. «Բարձրակարգ մարզիկի համար տարբերություն չպետք է լինի, քանի որ արդեն փորձով լի է: Իսկ երիտասարդ մարզիկներին գուցե խանգարի՝ մեկի համար մոտիվացիա լինի, մյուսի համար՝ հոգեբանական ճնշում: Իսկ իմ պարագայում դրական ազդեցություն ունեցով, ես մեր ժողովրդից, երկրպագուներից լիքը դրական էմոցիաներ ստացա, դա վերածվեց ազարտի, ու կարողացա հարվածներ հասցնել հակառակորդին»:
Նա նաեւ նշել է, որ լրացուցիչ ոգեւորություն էր դահլիճում հայ հայտնի բռնցքամարտիկների ներկայությունը: «Այս մրցաշարում նրանք էլ շատ կարեւոր դեր խաղացին»,- ընդգծել է մարզիկը: Խոսելով առաջիկա ծրագրերի մասին՝ Հովհաննես Բաչկովն ասել է՝ երեւի կվիրահատի ձեռքը, հետվիրահատական վերականգնողական փուլում կլինի, որոշ ժամանակ հետո արդեն պարզ կդառնա, թե ինչ կանի:
Հիշեցնենք՝ Երեւանում անցկացվող Եվրոպայի առաջնությանը բռնցքամարտիկ Հովհաննես Բաչկովը 63,5 կգ քաշայինների եզրափակչում մենամարտել է Ֆրանսիայի ներկայացուցիչ Լյունի Համրուիի հետ եւ տպավորիչ հաղթանակ տարել՝ նվաճելով Եվրոպայի չեմպիոնի տիտղոսը:
English
Русский
