Երևանում հրդեհ է բռնկվել հայտնի «Ուրարտու» տնտեսական ապրանքների խանութում. ժամանել են մեծ թվով հրշեջներ

Այսօր՝ օգոստոսի 25-ին, խոշոր հրդեհ է տեղի ունեցել Երևանում: Ժամը 04:15-ի սահմաններում Արտակարգ իրավիճակների նախարարության փրկարար ծառայության  911 ճգնաժամային կառավարման կենտրոն ահազանգ  է ստացվել, որ Երվանդ Քոչարի փողոցի թիվ 4  հասցեում գործող «Ուրարտու-2»  տնտեսական ապրանքների խանութում հրդեհ է բռնկվել:

Ինչպես հայտնում է ֆոտոլրագրող Գագիկ Շամշյանը, հրդեհի վայր են ժամանել ԱԻՆ ՓԾ թիվ 3, թիվ 8 հրեջ-փրկարարական ջոկատներից մեկական մարտական հաշվարկ: Տեղում հայտարարվել է հրդեհի բարդության «ԲԻՍ 1» աստիճան: Լրացուցիչ ժամանել է թիվ 4 հրշեջ-փրկարարական ջոկատը:

Մինչ հրշեջների ժամանումը, քաղաքացիներն իրենց ուժերով են կանխել կրակի տարածումը:

Ըստ նախնական տեղեկությունների՝ բարեբախտաբար, տուժածներ չկան: Քաղաքացիների ու հրշեջների աշխատանքի արդյունքում կանխվել է հրդեհի տարածումը առաջին հարկի խանութ և 2-րդ հարկի ՝«Վլադ Ֆիթնես» մարզասրահ:

Օպերատիվորեն ժամանել է նաև Երևանի 103 շտապօգնության բժիշկների հերթապահ խումբը և «Հայաստանի էլեկտրական ցանցեր» ընկերության ներկայացուցիչները: