Գլխիվայր շրջված մեքենայում եղել են 17 և 18 տարեկան տղաներ. Մանրամասներ դեպքից

Երեկ երեկոյան ավտովթարի հետևանքով մարմնական տարբեր աստիճանի վնասվածքներով հիվանդանոց տեղափոխված 3 քաղաքացիներից 2-ը՝ 17 և 18 տարեկան տղաները, Արցախից բռնի տեղահանվածներ են։

Oragir.News-ի տեղեկություններով՝ նրանք 2020 թվականի 44-օրյա պատերազմից հետո տեղափոխվել են Հայաստան և բնակություն են հաստատել Արագածոտնի մարզի գյուղերից մեկում։

«Տղաները Արցախից են, 2020 թվականին են տեղափոխվել մեր գյուղ, շնորհքով տղաներ են։ Դեպքի մասին քիչ առաջ եմ իմացել, այլ բան չեմ կարող փոխանցել»,- ասաց վարչական ղեկավարը։

Oragir.News-ի տեղեկություններով՝ ինչպես արցախցի տղաների, այնպես էլ վթարից տուժած 3-րդ քաղաքացու կյանքին, բարեբախտաբար, վտանգ չի սպառնում։

Ավելի վաղ հայտնել էինք, որ երեկ՝ դեեկտեմբերի 5-ին, խոշոր ավտովթար է տեղի ունեցել Արագածոտնի մարզում։ Ժամը 21:50-ի սահմաններում «Volkswagen Passat» մակնիշի ավտոմեքենան Երևան-Գյումրի ավտոճանապարհին՝ դեպի Երևան ընթանալիս՝ Կոշ գյուղի վարչական տարածքում, բախվել է նոր կառուցվող «Հյուսիս-հարավ» ճանապարհին տեղադրված բետոնե արգելապատնեշին, կոտրել այն, մոտ 30 մետր շպրտել, ապա առաջ ընթացել և գլխիվայր շրջվել։

Ինչպես դեպքի վայրից հայտնում է ֆոտոլրագրող Գագիկ Շամշյանը, վթարի հետևանքով 3 հոգի, որոնցից մեկի վիճակը բժիշկները գնահատում են ծանր, 2-ինը՝ միջին ծանրության, տեղափոխվել են «Աշտարակ» բժշկական կենտրոն։ Նախաձեռնվել է քրեական վարույթ։