Թուրքիայում կրկին ահռելի հրդեհներ են բռնկվել. Հրշեջները չեն կարողանում մարել այն

Թուրքիայի արևմտյան Մուղլա գավառում այսօր՝ ապրիլի 17-ին, անտառային հրդեհ է բռնկվել և այն շարունակվում է ավելի քան չորս ժամ: Այս մասին հաղորդում է «ՏԱՍՍ» լրատվական գործակալաությունը:

Ըստ ստացված տվյալների՝ հրդեհը բռնկվել է առավոտյան ժամը 5։00-ի սահմաններում Բոդրումի մոտ գտնվող Յակակոյ շրջանում։ Ուժեղ քամու ազդեցության տակ անտառային գոտուց բոցերը տարածվել են թփերի ու ձիթենիների վրա։ Հրշեջներին այս պահին չի հաջողվում մարել կրակը: Նրանց աջակցում են տեղացիները։

Նշենք, որ անտառային հրդեհները Թուրքիայում ամենամյա երևույթ են, սակայն 2021 թվականի ամռանը ամենամեծ անտառային հրդեհները տեղի են ունեցել անմիջապես հանրապետության հարավում գտնվող թուրքական 30 նահանգներում։ Հրդեհների հետևանքով զոհվել է 10, վիրավորվել ավելի քան 860 մարդ։