English
Русский
Երբ որ բանակում դեպքը գրանցվում է, ոչ միշտ է հնարավոր լինում ապահովել օրինական ներկայացուցչի ներկայությունը, որովհետեւ հատկապես ժամկետային զինծառայողների դեպքում ընտանիքի անդամների մի մասը դրսում են գտնվում: Այս մասին, այսօր՝ մայիսի 20-ին, ԱԺ-ում լրագրողների հետ զրույցում ասել է պաշտպանության փոխնախարար Տիգրան Բալայանը:
«Օրենքում որոշակի կարգավորումներ կան, որոնք չեն կարող նույն ծավալով կիրառվել զինված ուժերում: Նաեւ հարկադրանքի միջոցներ կիրառելու հետ կապված խնդիր ունենք:
Պատկերացրեք, դեպք է արձանագրվում եւ մասնագետների գնահատմամբ կա մտավախություն, որ անձի մոտ հոգեկան շեղում է առաջացել, ինչ-ինչ պայմանների բերումով դա ռիսկային գործընթաց է: Դա վախի մթնոլորտում կարող է առաջանալ, բայց ոչ միշտ է հնարավոր լինելու նույն արագությամբ, ինչպես քաղաքացիական կյանքում ստանալու դատարանի համապատասխան որոշում: Այսպիսի խնդիրներ կան: Դիրքերում չկան հոգեբուժական հաստատություններ եւ ոչ բոլոր դիրքերն են ապահովված որակյալ հոգեբույժներով: Հոգեբաններ բոլոր զորամասերում ունենք»,-ընդգծեց Բալայանը:
Ինչ վերաբերում է կորոնավիրուսի վարակի տարածմանը բանակում, փոխնախարարն ասաց. «Թիվը իրավասու չեմ հրապարակել, բայց բոլոր դեպքերը, որ ԶՈՒ-ում գրանցված են, լոկալիզացված են, այսինքն այնպիսի դեպք չունենք, որը այն շրջանակից չէր, որ ակնկալում էինք: Այս առավոտյան դրությամբ, եթե ոչ բոլորը, ապա մեծ մասն ասիմպտոմ է անցնում, կան թոքաբորբով դեպքեր, բայց ծանր, ծայրահեղ դեպքեր չունենք»:
