iPress.am- Երեկ՝ հունիսի 6-ին, երգչուհի Սիրուշոն և Լևոն Քոչարյանը նշում էին իրենց ամուսնության 12-րդ տարին: Այս առիթով Լևոնն Instagram-ի իր story բաժնում արխիվային լուսանկար էր հրապարակել:
Բացի դրանից՝ Սիրոշոյի հոր՝ ՀՀ վաստակավոր արտիստ Հրաչյա Հարությունյանի և որդիների՝ Ռոբերտի և Միքայելի հետ լուսանկարներ էր հրապարակել, որոնցում կրկին ցույց չէր տվել որդիների դեմքը:
Հատկանշական է, որ հենց նույն օրը ՀՀ երկրորդ նախագահ, Հայաստան դաշինքի առաջնորդ Ռոբերտ Քոչարյանը տեսանյութ էր հրապարակել ֆեյսբուքյան իր էջում, ցույց տալով, թե ինչպես է բասկետբոլ խաղում թոռնիկների հետ։ «Առավոտը թոռնիկների հետ,-այսպես էր վերնագրել տեսանյութը Ռոբերտ Քոչարյանը։
Տեսանյութում երևում էր նաև փոքրիկ տղա, ում տարիքը համապատասխանում էր Սիրուշոյի և Լևոնի ավագ որդու՝ Ռոբերտի տարիքին: Դժվար է ասել՝ արդյո՞ք տեսանյութում երևացող երեխան նրանց որդին է, թե ոչ: Նշենք, որ Ռոբերտ Քոչարյանի մյուս տղայի որդին տարիքով ավելի փոքր է, հետևաբար՝ տվյալ տեսանյութում նա չէ:
Հավելենք, որ որքան էլ Սիրուշոն և Լևոնը հրապարակում են իրենց որդիների լուսանկարներն ու նրանց մասնակցությամբ տեսանյութերը, նրանք ցույց չեն տալիս երեխաների դեմքը:
Հիշեցնենք, որ տարիներ առաջ Sirushow-ի ժամանակ Սիրուշոն խոստովանել էր, որ միշտ փորձել է այնպես անել, որ երեխան չտուժի իր գործունեության պատճառով և հակառակը: Անդրադառնալով այն փաստին, որ երեխայի մասին(այն ժամանակ դեռ մի որդի ուներ) հազվադեպ է խոսում և չի ցուցադրում նրան, երգչուհին նշել է. «Չեմ սիրում խոսել անձնական կյանքիս մասին, և դրա տրամաբանական շարունակութՈւյնն էլ այն է , որ չեմ ուզում հանրայնացնել նաև երեխայիս կյանքը: Ես չեմ ուզում, որ իմ երեխան լինի հանրային և ճանաչված, չեմ ուզում, որ նա առանձնանա մյուսներից»: