ՇՏԱՊ. ՌԴ-ն արտահանձնում է Ալրաղացի Լյովիկին

Ռուսաստանի գլխավոր դատախազությունը որոշել է բավարարել հայաստանցի գործընկերների հարցումը ավազակությանը մասնակցելու համար փնտրվող ՀՀ ԱԺ նախկին պատգամավոր Լևոն Սարգսյանի արտահանձման վերաբերյալ։ Այս տեղեկությունը ՌԻԱ Նովոստիին հայտնել են գերատեսչությունում։

Նրան մինչև 15 տարի ազատազրկում է սպառնում։

Մարտին ՀՀ գլխավոր դատախազի խորհրդական Գոռ Աբրահամյանը հայտնել էր, որ ռուսական կողմը որոշել է Երևանին փոխանցել Սարգսյանին։

«ՀՀ գլխավոր դատախազության հարցումը նրան փոխանցելու մասին ներկայացվել է ՌԴ դատախազություն միջազգային պայմանագրերով սահմանված ժամկետներում՝ անհրաժեշտ փաստաթղթերով հանդերձ։ 2020 թվականի մարտի 19-ին ՌԴ դատախազությունը որոշում է կայացրել բավարարել ՀՀ գլխավոր դատախազության հայցը Սարգսյան Լ․Հ․-ին հանձնելու մասին՝ նրան մեղասգրվող հանցագործությունների համար քրեական պատասխանատվության ենթարկելու նպատակով», - նշված է գերատեսչության պատասխանում։

Սարգսյանը եղել է ԱԺ մի քանի գումարման պատգամավոր, Հանրապետական կուսակցության անդամ։

Հիշեցնենք` «Ալրաղացի Լյովիկ» մականունով Լևոն Սարգսյանի նկատմամբ հետախուզում էր հայտարարվել 2018 թվականին։

Նա ներգրավվել է որպես մեղադրյալ՝ կազմակերպված խմբի կազմում առանձնապես խոշոր չափերով գույք հափշտակելու նպատակով ավազակային հարձակում կատարելու և հանցավոր համագործակցությանը մասնակցելու համար (12 տարի առաջ մաքսային պետական կոմիտեի նախկին պետ Արմեն Ավետիսյանի առանձնատան վրա ավազակային հարձակումը պատվիրելու մեջ): Հաշվի առնելով, որ վերջինս տևական ժամանակ բացակայել է ՀՀ-ից, գտնվելու վայրը հայտնի չէ՝ նրա նկատմամբ հայտարարվել էր հետախուզում, որպես խափանման միջոց ընտրվել է կալանավորումը: 

ՀՀ քրեական օրենսգրքի 175-րդ հոդվածի 3-րդ մասի 1-2-րդ կետերի և 223-րդ հոդվածի 2-րդ մասի հատկանիշներով 2018 թվականի հոկտեմբերի 1-ից հետախուզվող, Երևանի բնակիչ, 1968 թվականին ծնված Լևոն Հրաչյայի Սարգսյանը հայտնաբերվել և ձերբակալվել էր 2019 թվականի նոյեմբերի 21-ին ՌԴ Մոսկվայի մարզի Զելենոգրադ քաղաքում։