Արցախ մեկնել էինք 220 ազատամարտիկներով, ունեցանք 3 զոհ, 7 վիրավոր, 2 անհետ կորած․ Ռուբեն Գևորգյան

Մեր զինվորը, մեր պահեստազորը ու կամավորները անպարտելի պատերազմում են, մեր բանակը հերոսաբար պայքարում է Թուրքիայի ու ահաբեկիչների դեմ։

Նրանք հարձակողական գործողություններ են իրականացնում ու ծանր մարտերում ջախջախվում։ Այս մասին Tert.am-ի հետ զրույցում ասաց «Երդվյալ ազատամարտիկների միության» նախագահ, ԱԺ նախկին պատգամավոր Ռուբեն Գևորգյանը։ Նա մանրամասնեց, որ իրենց ջոկատը գտնվում է Արցախի հարավային  հատվածում։

«Առավոտյան էլ ծանր մարտեր էին ընթանում, բայց թշնամին պարբերաբար լռեցվում է, մեր զինվորի ոգին, պատրաստվածությունը բարձր մակարդակի վրա է։ Ի վերջո մեր բանակը, պահեստազորն ու կամավորը հաղթանակով պարտադրելու են խաղաղություն», -ասաց նա։

Ռուբեն Գևորգյանը նշեց՝ այս օրերի ընթացքում իրենց ջոկատից տղաներ են նահատակվել։ «Ունեցանք 3 զոհ, 7 վիրավոր, 2 անհետ կորած։ Արցախ էինք մեկնել 220 ազատամարտիկներով»,-ասաց նա։