Պարզվել է ողբերգական ավտովթարի հետևանքով մահացածի և վիրավոր ԱԱԾ աշխատակիցների ինքնությունը. ՏԵՍԱՆՅՈՒԹ

 Հայաստանի քննչական կոմիտեի Լոռու մարզային քննչական վարչության Սպիտակի քննչական բաժնի հատկապես կարևոր գործերով ավագ քննիչ Երեմ Դանիելյանի որոշմամբ ՀՀ քր-օր-ի 242 հոդվածի 2-րդ մասի հատկանիշներով հարուցված քրեական գործի շրջանակում պարզվել է հունվարի 13-ին Լոռու մարզում տեղի ունեցած խոշոր և ողբերգական ավտովթարի հետևանքով մահացածի, վարորդների և վիրավորների ինքնությունը:

Պարզվել է, որ VAZ 2107 ավտոմեքենան վարել է Լուսաղբյուր գյուղի բնակիչ 58 ամյա Հրաչյա Հակոբյանը, իսկ VAZ 21099 ավտոմեքենան վարել է Շիրակի մարզի Մարմաշեն գյուղի բնակիչ 32 ամյա Գևորգ Վարդանյանը,այս մասին հայտնում է Shamshyan.com-ը

Վթարի հետևանքով վարորդներից Հ․ Հակոբյանը տեղում մահացել է, իսկ նրա ուղևոր Լուսաբյուր գյուղի բնակիչ 60 ամյա Կարապետ Հակոբյանը և VAZ 21099 մեքենայի վարորդ Գ․Վարդանյանը, նրա ուղևորներ Խնկոյան գյուղի բնակիչ 33 ամյա Արայիկ Կոծինյանը, Շիրակի մարզի Աշոցքի բնակիչ 27 ամյա Աշոտ Սարիբեկյանը, Լուսաղբյուր գյուղի բնակիչ 32 ամյա Արմեն Բեգզադյանը մարմնական վնասվածքներով տեղափոխվել են «Սպիտակ», «Վանաձոր» և «Գյումրի» բժշկական կենտրոններ;

Աղբյուրի տեղեկություններով մահացած Հ․Հակոբյանն աշխատում էր Հարավ-Կովկասյան երկաթուղի ՓԲԸ «Ղալթախչի» կայարանի հերթապահ, իսկ վարորդ Գ․ Վարդանյանը ծառայում է ՀՀ Ազգային անվտանգության ծառայութան սահմանապահ զորքերի Գոգավան սահմանային վերահսկողության բաժնում։

Վիրավորներից Կ․ Հակոբյանը ծառայում է N զորամասում՝ որպես հրաձիգ, մյուս վիրավորներ Ա. Սարիբեկյանը, Ա.Բեգզադյանը, Ա․Կոծինյանը ծառայում են ՀՀ ԱԱԾ սահմանապահ զորքերի Գոգավան սահմանային վերահսկողության բաժնում։

Հունվարի 13-ին խոշոր ու ողբերգական ավտովթար էր տեղի ունեցել Լոռու մարզում։ Ժամը 08։10-ի սահմաններում Սպիտակ-Գյումրի ավտոճանապարհի 20 կմ հատվածում, դեռևս անհայտ հանգամանքներում, բախվել էին VAZ 2107 և VAZ 21099 մակնիշի ավտոմեքենաները։ Վթարի հետևանքով 1 հոգի տեղում մահացել էր, 4 հոգի մարմնական վնասվածքներով տեղափոխվել էին «Սպիտակ» բժշկական կենտրոն։

Վիրավորներին առաջինն օգնության էին հասել քաղաքացիները։

Դեպքի վայրում հավաքվածները նշում էին, որ օպերատիվ են գործել «Սպիտակի» հիվանդանոցի բժիշկները։ Վիրավորների մի մասին տեղափոխել էին շտապօգնության մեքենայով, մի մասին էլ քաղաքացիները՝ իրենց ավտոմեքենաներով։