Ռոբերտ Քոչարյանի ազատության հանձնախմբի կազմակերպած կոնֆերանսին այսօր ՀՀ երկրորդ նախագահ Ռոբերտ Քոչարյանի պաշտպաններից Արամ Օրբելյանն իր ելույթում անդրադարձավ սահմանադրական կարգի տապալման գործի անհեռանկարայնությանը:
««Մարտի 1-ի» գործ, որպես այդպիսին, մեկ ամբողջությամբ գոյություն չունի: Դատական նիստերի ժամանակ և տարբեր քննարկումների ժամանակ ակնհայտ խեղաթյուրում է տեղի ունենում` փորձելով մեկ գործը մյուսով ներկայացնել: Պետք է պատկերացնենք՝ ինչի մասին է խոսքը, առաջադրված մեղադրանքը ընթերցելուց` 300.1 հոդվածով, ըստ էության երկու գործողություն ենք տեսնում. փետրվարի 23-ին բանակի հրամանատարական կազմի հետ հանդիպումները և մարտի 1-ի արտակարգ դրության հրամանագիրը»,-ասաց նա և նշեց, որ զորքեր օգտագործել ձևակերպումը ինքնին գործողություն չէ:
««Մարտի 1-ի» գործը տասը զոհերի մասին չէ, դա առանձին քննվում է, կապ չունեն զոհերը այս գործի հետ, և այս գործը կապ չունի նախագահական ընտրությունների օրինականության հետ»,-ասաց նա և նշեց, որ այն հոդվածը, որով առաջադրված է Ռոբերտ Քոչարյանի մեղադրանքը, ուժի մեջ է մտել 2009 թվականին:
«Այս գործն այն գործը չէ, որտեղ զոհերի մահվան հանգամանքները պետք է պարզել: Մի շարք իրավական էլեմենտներ կան, որոնք ասում են, որ այս գործը հեռանկար չունի»,-ասաց նա:
Արամ Օրբելյանը հստակեցրեց, որ սահմանադրական կարգը տապալելու հոդվածն ուժի մեջ է մտել 2009 թվականի մարտի 18-ից, իսկ 2008 թվականին այդպիսի հոդված չկար, և 300.1 հոդվածը այսօրվա տեքստով ևս չի կարող կիրառվել:
«300 հոդվածը կիրառելի չէ, 300.1 հոդվածը կիրառելի չէ, եթե հանկարծ որոշեն, ինչ-որ մեկի մտքով անցնի, թե կիրառելի է, իրար հետ կապ չունեն, հետևաբար էլի կիրառելի չէ»,-ասաց նա:
Փաստաբանն անդրադարձավ նաև անձեռնմխելիությանը և նշեց, որ նախագահի անձեռնմխելիության հետ կապված Սահմանադրության մեջ ունենք 140 հոդված: «Նախագահն իր լիազորությունների ժամկետում և դրանից հետո չի կարող հետապնդվել և պատասխանատվության ենթարկվել իր կարգավիճակից բխող գործողությունների համար, արտակարգ դրության հրամանագիր ստորագրելը աշխարհի ոչ մի երկրի ողջամիտ մարդ չի կարող ասել, թե իր լիազորություններից բխող գործողություն չէ»,-ասաց նա:
Պաշտպանը նաև խոսեց դատարանների նկատմամբ ճնշումների մասին` գաղտնալսումներ, դատարանների շրջափակում, հրապարակային ելույթներում ուղղակի մեղադրանքներ այն դատարաններին, որոնք համարձակվում են որոշումներ կայացնել, ինչպես նաև փաստաբանների նկատմամբ ճնշումներ, որոնց ընթացք չի տրվում: Ըստ նրա` այս ամենը ցույց է տալիս, թե ինչ է կատարվում դատական համակարգում:
«Սա նշանակում է, որ դատական իշխանության ներկայացուցիչները, առնվազն դրանց մի մասը, ուղղակի կախվածության մեջ են, այն մնացածի մի մասն էլ ինքնացենզուրայի է ենթարկվում, ասում է՝ գլուխս չդնեմ սրա տակ: Քանի դեռ այս խախտումները վերացված չեն, «Մարտի 1-ի» որևէ գործ նորմալ քննվել չի կարող»,-ասաց նա:
English
Русский
