Մանրամասներ «Եռաբլուր»-ի դիմաց ողբերգական ավտովթարի դեպքից

Հայաստանի քննչական կոմիտեի Երևան քաղաքի քննչական վարչության ճանապարհատրանսպորտային հանցագործությունների քննության բաժնի հատկապես կարևոր գործերով ավագ քննիչ Անդրանիկ Փարսադանյանի որոշմամբ ՀՀ քր օր-ի 242 հոոդվածի 2-րդ մասի հատկանիշներով հարուցված քրեական գործի շրջանակում պարզվել է հունվարի 30-ին Սեբաստիա փողոցում «Եռաբլուր» զինվորական պանթեոնի մուտքի դիմաց խոշոր ու ողբերգական ավտովթարի հետևանքով տեղում մահացածի, վարորդների և վիրավորների ինքնությունը:

Պարզվել է՝ Volkswagen-ը վարել է Երևանի բնակիչ, 22-ամյա Նարեկ Բաղդասարյանը, իսկ Toyota Camry-ն վարել է Երևանի բնակիչ, 32-ամյա Ռուշան Թադևոսյանը, այս մասին հայտնում է Shamshyan.com-ը:

Վթարի հետևանքով վերջինիս ուղևոր, Երևանի բնակիչ, 69-ամյա Ռաֆիկ Թադևոսյանը, տեղում մահացել է, իսկ վարորդ Ռ. Թադևոսյանը, նրա մյուս ուղևորներ, Երևանի բնակիչ, 58-ամյա Գոհար Սիմոնյանը, մարմնական վնասվածքներով տեղափոխվել են «Արմենիա» բժշկական կենտրոն, իսկ 6-ամյա Գոհար Թադևոսյանն ու 4-ամյա Ռաֆայել Թադևոսյանը տեղափոխվել են «Աստղիկ» բժշկական կենտրոն, իսկ Volkswagen-ի վարորդ Ն. Բաղդասարյանը տեղափոխվել է «Աստղիկ» բժշկական կենտրոն:

Աղբյուրի տեղեկություններով՝ մահացածը Toyota Camry-ի վարորդի հայրն էր, իսկ վիրավորները նրա ազգականներն են:

Ինչպես ավելի վաղ դեպքի վայրից հայտնել էր աղբյուրը, հունվարի 30-ին ճանապարհի մերկասառույցի պատճառով խոշոր ու ողբերգական ավտովթար էր տեղի ունեցել Երևանում:

Ժամը 20:30-ի սահմաններում, Սեբաստիա փողոցում՝ «Եռաբլուր» զինվորական պանթեոնի կամարի դիմաց, ճանապարհը մերկասառույցից չմշակելու հետևանքով ճակատ-ճակատի բախվել էին Toyota Camry և Volkswagen մակնիշի ավտոմեքենաները: Վթարի հետևանքով 1 հոգի տեղում մահացել էր, 4 հոգի բժշկական հետազոտման նպատակով տեղափոխվել էին Երևանի տարբեր հիվանդանոցներ: