Նոր մանրամասներ «Ծիրանի այգի» ռեստորանում տեղի ունեցած սպանությունից. մահացածը Արցախյան պատերազմի մասնակից էր

Երեկ՝ փետրվարի 6-ին, սպանություն է տեղի ունեցել Կոտայքի մարզում:

Ժամը  23:00-ի սահմաններում ոստիկանության Կոտայքի բաժին ահազանգ է ստացվել, որ Առինջ գյուղում գործող «Ծիրանի այգի» ռեստորանային համալիրում ծեծկռտուք է տեղի ունենում:

«Ծիրանի այգի» ռեստորանային  համալիր են մեկնել  ոստիկնության Կոտայքի մարզային վարչության օպերատիվ խումբը՝ վարչության պետ Արթուր Զոհրաբյանի, ոստիկանության Կոտայքի բաժնի պետ Սարո Ռուստամյանի գլխավորությամբ, այս մասին հայտնում է Shamshyan.com-ը:

 Ոստիկաններն ու քննիչները պարզել են, որ  մահացածը Հրազդան քաղաքի բնակիչ,  23-ամյա Թաթուլ Մարտիրոսյանն էր: 

Մինչ դեպքի վայրում աշխատում էին   ոստիկանության փորձաքրեագիտական վարչության  փորձաքրեագետները, ոստիկաններն ու քննիչները պարզել են, որ նշված վայրում մարմնական վնասվածք  է ստացել նաև   Հրազդան քաղաքի բնակիչ, 22-ամյա Սահակ Կարապետանը:

Աղբյուրի տեղեկություններով՝  վիրավորի կյանքը հնարավոր է եղել փրկել  նշված ռեստորանային համալիրի աշխատակիցների կողմից ճիշտ առաջին անհրաժեշտության բժշկական օգնություն ցուցաբերելու արդյունքում, իսկ ճանապարհին մահացածին ռեստորանի աշխատակիցներն են նկատել դրսում՝ արդեն վիրավոր վիճակում, և նրան էլ են առաջին բուժօգնութունը ցուցաբերել, ապա ավտոմեքենայով տեղափոխել են հիվանդանոց: 

Ճանապարհին նկատել են շտապօգնության ավտոմեքենա և տեղափոխել են շտապօգնության մեքենայի մեջ, սակայն վերջինս ճանապարհին մահացել է:

Աղբյուրի տեղեկություններով, մահացած Թ. Մարտիրոսյանը ծառայություն էր անցկացնում առաջնագծում, նոր էր վերադարձել դիրքերից և աշխատանքի անցել ժամանցի ծառայություններ մատուցող ընկերություններից մեկում: 

Ըստ տարածված տեղեկության Թաթուլ Մարտիրոսյանը Հրազդան քաղաքի Միկրոշրջան թաղամասից էր: Թաթուլը մասնակցել էր Արցախյան վերջին պատերազմին: