Համացանցում հայտնվել են ամերիկյան Apple տեխնոլոգիական ընկերության iPhone սմարթֆոնի նոր մոդելների մակետների լուսանկարները, որոնք հնարավորություն են տալիս մոտավոր պատկերացում կազմել ապագա նորույթների դիզայնի վերաբերյալ:
Ինչպես նշում է hi-tech.mail.ru-ն, ըստ այդմ՝ iPhone 12-ը կստանա հին iPhone 4-ի և նոր iPad Pro-ի ոճի դիզայն:
Լրագրող Սոնի Դիքսոնը, որը լուսանկարները հրապարակել է իր թվիթերյան միկրոբլոգում, նախազգուշացրել է, որ տվյալ մակետներում տեսախցիկների դիզայնը տարբերվում է վերջնական մոդելներից: Օրինակ՝ iPhone 12-ի փոքր մոդելը՝ 5,4 դյույմանոց անկյունագծով էկրանով, կունենա երկու տեսախցիկ, իսկ ամենամեծ մոդելը (էկրանը՝ 6,7 դյույմ անկյունագծով) կունենա միանգամից չորս տեսախցիկ:
iPhone 12-ի շարքը կունենա միանգամից չորս մոդել՝ երկու հիմնական և երկու «պրո» մոդել: Ամենամատչելին կլինի ամենափոքր մոդելը (5,4 դյույմ): Մյուս երկու մոդելները՝ մեկը սովորական, մյուսը՝ «պրո», կունենան 6,1 դյույմ անկյունագծով էկրան, իսկ ամենամեծը կունենա 6,7 դյույմանոց էկրան:
Ըստ ոլորտի փորձագետների՝ ընկերությունն այս տարվա նորույթների սեպտեմբերյան շնորհանդեսը կտեղափոխի հոկտեմբեր, ինչը պայմանավորված է կորոնավիրուսային համավարակով:
English
Русский
