Մահվան ելքով վրաերթ. հետիոտնը հիվանդանոցում մահացել է

Երեկ՝ մայիսի 26-ին, մահվան ելքով վրաերթ է տեղի ունեցել Արարատի մարզում։

Ժամը 19։40-ի սահմաններում Մասիս քաղաքի բնակիչ՝ 46-ամյա Ազատ Մ-ն իր վարած Opel Zafira մակնիշի ավտոմեքենայով Մասիս քաղաքի Հանրապետության փողոցում՝ «Իդեալ» խանութի դիմաց, վրաերթի է ենթարկել Մասիս քաղաքի բնակիչ՝ 62-ամյա Աբել Ս-ին։

Վարորդը փախուստի չի դիմել, իր ավտոմեքենայով վրաերթի ենթարկվածին տեղափոխել է Մասիսի բժշկական կենտրոն, ով 2 ժամ անց գիտակցության չգալով՝ մահացել է,այս մասին հայտնում է Shamshyan.com-ը:

Վարորդն այնուհետև ինքնակամ ներկայացել է ոստիկանության Մասիսի բաժին։ Դեպքի վայր են ժամանել Ճանապարհային ոստիկանության 2-րդ սպայական գումարտակի 1-ի վաշտի 2-րդ դասակի ծառայողները՝ վաշտի հրամանատար Գրիգոր Պողոսյանի, դասակի հրամանատար Կարապետ Հարությունյանի գլխավորությամբ։ Ժամանել են նաև ոստիկանության Մասիսի բաժնի օպերատիվ խումբը՝ բաժնի պետ Արմեն Խաչատրյանի գլխավորությամբ։

Փաստի առթիվ ՃՈ 2-րդ սպայական գումարտակի 1-ին վաշտի հետաքննիչ Արմեն Գաբրիելյանի կողմից նախապատրաստված նյութերը փոխանցվել են Հայաստանի քննչական կոմիտեի Արարատի մարզային քննչական վարչություն։