Նոր մանրամասներ Հրազդանում տեղի ունեցած ողբերգական ավտովթարից.Տեսանյութ

Հայաստանի քննչական կոմիտեի Կոտայքի մարզային քննչական վարչության հատկապես կարևոր գործերով ավագ քննիչ Վարդան Դավթյանի որոշմամբ՝ ՀՀ քր-օր-ի 242 հոդվածի 2-րդ մասի հատկանիշներով հարուցված քրեական գործի շրջանակում, պարզվել է ապրիլի 10-ին Հրազդան քաղաքում տեղի ունեցած ողբերգական ավտովթար հետևանքով մահացածի, վարորդի և վիրավորների ինքնությունը:

Պարզվել է, որ Mercedes CLS մակնիշի ավտոմեքենան վարել է Հրազդան քաղաքի բնակիչ, 31-ամյա Գևորգ Մարտիրոսյանը, հիվանդանոց տեղափոխվելու ճանապարհին մահացել է Հրազդան քաղաքի բնակիչ, 26-ամյա Հասմիկ Գևորգյանը, իսկ վարորդ Գ. Մարտիրոսյանն ու մյուս ուղևորներ, Հրազդան քաղաքի բնակիչներ, 28-ամյա Մարիամ Օսիպյանը և 23-ամյա Հրաչ Առաքելյանը մարմնական վնասվածքներով տեղափոխվել էին «Հրազդան» բժշկական կենտրոն,այս մասին հայտնում է Shamshyan.com-ը

Ապրիլի 10-ին ողբերգական ավտովթար էր տեղի ունեցել Կոտայքի մարզում: Ժամը 21:30-ի սահմաններում Mercedes CLS մակնիշի 31 33- 19 IA տրանզիտ համարանիշի ավտոմեքենայի վարորդը Հրազդան քաղաքի Զորավար Անդրանիկի 3-րդ փողոցում, դեռևս անհայտ հանգամանքներում, դուրս էր եկել հանդիպակաց երթևեկելի գոտի, բախվել կիսակառույց շինության բետոնե պատին և կոտրել այն:

Վթարի հետևանքով 4 հոգի, որոնց ավտոմեքենայից դուրս էին բերել քաղաքացիները, օպերատիվորեն դեպքի վայր ժամանած Հրազդանի հիվանդանոցի շտապօգնության բժիշկների խումբը տեղափոխել էր «Հրազդան» բժշկական կենտրոն: Ճանապարհին վիրավորներից մեկը, ով երիտասարդ աղջիկ էր, գիտակցության չգալով՝ մահացել էր:

Փաստի առթիվ քննչական վարչությունում հարուցվել էր քրեական գործ՝ ՀՀ քր օր-ի 242 հոդվածի 2-րդ մասի (ճանապարհատրանսպորտային պատահար, որն անզգուշությամբ առաջացրել է մարդու մահ) հատկանիշներով: