Առանձնակի դաժանությամբ սպանություն. հայտնաբերվել է կացնահարված տղամարդու դի

Aյսօր՝ ապրիլի 21-ին, դաժան սպանություն է տեղի ունեցել Գեղարքունիքի մարզում:

Ժամը 13:50-ի սահմաններում ոստիկանության Ճամբարակի բաժին ահազանգ է ստացվել, որ Ճամբարակ խոշորացված համայնքի Վահան գյուղի տներից մեկում տղամարդու դի կա:

Դեպքի վայր են ժամանել ոստիկանության Գեղարքունիքի մարզային վարչության օպերատիվ խումբը՝ վարչության պետ Գևորգ Հակոբյանի, վարչության պետի օպերգծով տեղակալ Տիգրան Պետրոսյանի, ոստիկանության Ճամբարակի բաժնի պետի օպերգծով տեղակալ Սամվել Խաչատրյանի գլխավորությամբ,այս մասին հայտնում է Shamshyan.com-ը:

Ոստիկաններն ու քննիչները Վահան գյուղի սեփական տան մեջ հայտնաբերել են տանտիրոջ՝ 66-ամյա Լյովիկ Բարսեղյանի դին:

Աղբյուրի տեղեկություններով՝ ժամանած դատաբժիշկը ոստիկաններին և քննիչներին հայտնել է, որ մահացածի գլխին կան կացնի մի քանի հարվածի հետքեր: Մինչ դատաբժիշկը զննում էր դին, Գեղարքունիքի մարզի ոստիկաններն ու քննիչները, կատարելով ճիշտ օպերատիվ-հետախուզական և քննչական համատեղ միջոցառումներ, պարզել են կասկածյալի ինքնությունը, սակայն նրան հայտնաբերելու ուղղությամբ մարզի ոստիկանապետ Գ. Հակոբյանի և մարզի ոստիկանապետի օպերգծով տեղակալ Տ. Պետրոսյանի գլխավորությամբ որոնողական աշխատանքները սկսվել են Ճամբարակ –Վարդենիս, Ճամբարակ-Սևան ավտոճանապարհին, ինչն էլ տվել է իր դրական արդյունքը:

Մարզի ոստիկանները կարճ ժամանակում օպերատիվ տեղեկություններ են ստանում, որ նա ուղևորվում է դեպի Սևան և արդեն Լճաշեն գյուղի վարչական տարածքում դարանակալելով՝ Սևանի ոստիկանների ու քննիչների հետ կարողանում են պրոֆեսիոնալ ձևի վնասազերծել Վահան գյուղի բնակիչ, 62-ամյա Պետիկ Դեմիրճյանին ու հրաշք է, որ իրավապահները կարողացել են ճիշտ գոծել, քանի որ նրա մոտ եղել է 2 մարտական նռնակ՝ իր պայթուցիչներով: Ու եթե նա գործի դներ ռազմամթերքը, կունենայինք զոհեր:

Փաստի առթիվ Սևանի քննչական բաժնի պետի տեղակալ Նաիրի Պողոսյանի որոշմամբ հարուցվել է քրեական գործ՝ ՀՀ քր օր-ի 104 հոդվածի 1-ին մասի և 235 հոդվածի 1-ին մասի հատկանիշներով:

Քննիչ Ն. Պողոսյանի որոշմամբ կասկածյալ Պ. Դեմիրճյանը ձերբակալվել է: Ֆոտոլրագրողը հայտնում է, որ հաշվի առնելով հանցագործության վտանգավորության աստիճանը, դեպքի վայր է ժամանել նաև մարզի դատախազ Ռաֆայել Երիցյանը: Գ. Շամշյանի տեղեկություններով՝ հայտնաբերվել է նաև հանցագործության գործիք կացինը: