Հայաստանում հավանաբար ուռճացնում են կորոնավիրուսով վարակվածների թիվը` ԱՀԿ-ից գումար ստանալու համար

Չի բացառվում, որ Հայաստանում արվում է ամեն ինչ` կորոնավիրուսով վարակվածների ցուցանիշների ցուցանիշները մեծացնելու եւ Առողջապահության համաշխարհային կազմակերպությունից գումար ստանալու համար: Այս մասին ապրիլի 28-ին լրագրողների հետ հանդիպման ժամանակ հայտարարեց Paracelsus հասարակական կազմակերպության հիմնադիր Նունե Ներսիսյանը:

Այդ մասին են, նրա խոսքով, վկայում բազմաթիվ հաղորդումները, ըստ որոնց չվարակված մարդկանց մեկուսացնում են վարակված հիվանդների հետ միասին: Նա պարզաբանեց, որ դա արվել է Մարալիկի ծննդատան աշխատակցուհու դեպքում:

«Բացի այդ, սոցիալական ցանցի օգտատեր Էլինա Այվազյանն անձնական նամակ է գրել ինձ, իսկ ապա տեղադրել է նաեւ իր էջին` ասելով, որ մարդկանց 100 հազարական դրամ է տրվել` սրտի կաթվածից մահը կորոնավիրուսից մահվանը վերագրելու համար: Մեկ այլ օգտատեր` Մարի Դալաքյանը, հայտարարել է, որ իր բարեկամուհուն դրական թեստով եւ սուր թոքաբորբով տեղափոխել են Մալաթիա-Սեբաստիայի «Սուրբ Աստվածածին» ծննդատուն, եւ նրան որեւէ օգնություն, բացի ջերմաստիճանը չափելուց, չի ցուցաբերվել»,- հավելեց Նունե Ներսիսյանը:

Նա նկատեց, որ ոչ ոք սոցիալական հեռավորություն չի պահպանում, եւ մարդիկ գնում են` ուր ուզեն, իսկ թերթիկներ լրացնելը պարզապես քաղաքացիների տեղաշարժը վերահսկելու միջոց է:

«Երկրում ոչ թե իրական, այլ միայն հոգեբանական արտակարգ դրություն է»,- շեշտեց Նունե Ներսիսյանը: Անդրադառնալով Հայաստանում տիրող սոցիալ-տնտեսական իրավիճակին` ՀԿ ղեկավարը կարծիք հայտնեց, որ «այսօր իշխանությունները պետական մակարդակով ռեկետ են իրականացնում, երբ իրենք պարգեւավճարներ են իրենց համար դուրս գրում ներկայիս պայմաններում»: