Երիտասարդների ֆուտբոլային խաղը վերածվել է վեճի և ծեծկռտուքի. 20-ամյա երիտասարդը մահացած վիճակում տեղափոխվել է հիվանդանոց.մանրամասներ

Ինչպես ավելի վաղ հայտնել էր Aravot.am-ը, մայիսի 27-ին մահացած վիճակում «Գյումրի» բժշկական կենտրոն էին տեղափոխել 20-ամյա մի երիտասարդի։ Ինչպես Aravot.am-ին տեղեկացրել էր «Գյումրի» բժշկական կենտրոնի փոխտնօրեն Արմեն Խաչատրյանը, նրան բուժօգնություն ցուցաբերել հնարավոր չէր, կենսաբանական մահն արդեն վրա էր հասել։

Հայաստանի քննչական կոմիտեի Գեղարքունիքի մարզային քննչական վարչության հատկապես կարևոր գործերով ավագ քննիչ Մ. Բիշարյանի որոշմամբ որպես կասկածալ ձերբակալվել է Շիրակի մարզի Մարմաշեն խոշորացված համայնքի բնակիչ՝ 17-ամյա Հովհաննես Խ-ն։

Վերջինս կասկածվում է մայիսի 27-ին Վահրամաբերդ գյուղի բնակիչ՝ 20-ամյա Զարզանդ Մանուկյանին մահվան հասցնելու մեջ։

Shamshyan.com-i տեղեկություններով՝ ոստիկանության Շիրակի մարզային վարչության և Հայաստանի քննչական կոմիտեի Շիրակի մարզային քննչական վարչության քննիչները, ձեռնարկելով անհրաժեշտ օպերատիվ-հետախուզական և քննչական համատեղ գործողություններ, պարզել են, որ մայիսի 27-ին, ժամը 21։15-ի սահմաններում «Գյումրի» բժշկական կենտրոն մահացած վիճակում տեղափոխվել էր Զ. Մանուկյանը։

Հիվանդանոցում արձանագրվել էր, որ նա հանկարծամահ է եղել։ Նույն օրը քննիչի որոշմամբ նշանակվում է դիակի դատաբժշկական փորձաքննություն, և պարզվում է, որ նա հանկարծամահության հետևանքով չի մահացել։ Ոստիկաններն ու քննիչները պարզել են նաև, որ նախնական տվյալներով՝ դեպքի օրը Վահրամաբերդ և Մարմաշեն գյուղի երիտասարդները ֆուտբոլ են խաղացել, որի ժամանակ վեճ է սկսվել ու խմբակային ծեծ։

Այդ ընթացքում էլ մահացած երիտասարդը վնասվածքներ է ստացել ու տեղափոխվել հիվանդանոց։ Դատաբժիշկը դիակի արտաքին զննությամբ հայտնաբերել է ձախ արմունկային շրջանին հարվածի հետքեր։ Ոստիկաններն ու քննիչները նաև տեղեկություններ են ստացել, որ մահացածը ֆուտբոլի խաղի ժամանակ այդտեղ չի եղել, և միայն հետո են զանգել, կանչել, ու հիմա նշված տեղեկությունները քննիչի հանձնարարականով տարածքայիյն ոստիկանության քրեական հետախուզության և համայնքային ոստիկանության բաժանմունքների ծառայողները պարզում են։

Եթե քննչական մարմնի կասկածները հաստատվեն, ապա քննիչը դիմելու է Շիրակի մարզի ընդհանուր իրավասության դատարան, որպեսզի դատարանը երկամսյա կալանքի որոշում կայացնի կասկածյալ Հովհաննես Խ-ի նկատմամբ։