Եղբայրների վիճակը ծայրահեղ ծանր է, մեկին վիրահատել են. նոր մանրամասներ Գավառի դեպքից

Երեկ Գավառի բժշկական կենտրոն տեղափոխված ու հարձակման ենթարկված երկու եղբայրների` Արմեն և Դավիթ Հայթայանների վիճակը ծայրահեղ ծանր է. նրանցից մեկը ծեծից հետո վիրահատվել է։ Ինչպես դեպքի վայրից հայտնում է Sputnik Արմենիայի թղթակիցը` երկու եղբայրներից մեկին դեպքից հետո Գավառի ԲԿ–ում վիրահատել են (սիրտը, թոքերն ու պարանոցը)։

Մեր տեղեկություններով` երեկ շուրջ 300 մարդ է հավաքված եղել հիվանդանոցի մոտ, նրանցից քառասունին, լոմերով ու դանակներով զինված, հաջողվել է ներխուժել հիվանդանոց։ Գավառի ԲԿ–ն երկու մուտք ունի, որտեղ հսկողություն են իրականացրել ոստիկանները, սակայն նրանց հրելով` այդ 40–ը ներխուժել են ներս, մտել Հայթայանների սենյակ ու վնասել եղբայրներին։ Եղբայրներին Գավառի ԲԿ–ում վիրահատելուց հետո տեղափոխել են երևանյան հիվանդանոցներ։

Ի դեպ, Հայթայան եղբայրները ոչ թե կրակոցների հետևանքով են հիվանդանոցում հայտնվել, այլ դեպքի վայրից փորձել են փախուստի դիմել, սակայն վթարի են ենթարկվել ու տեղափոխվել հիվանդանոց։

Այս պահին արդեն իսկ մի քանի տասնյակ բերման ենթարկվածներ կան։ Տեղում են առողջապահության նախարար Արսեն Թորոսյանն ու Գեղարքունիքի մարզպետ Գնել Սանոսյանը։