Երևանում երիտասարդ է սպանվել, կա նաև վիրավոր

SHAMSHYAN.com-ի տեղեկություններով՝ քիչ առաջ արտակարգ դեպք է տեղի ունեցել Երևանում: Երևանի 1-03 շտապօգնության բժիշկների հերթապահ խումբը թիվ 1 համալսարանական հիվանդանոց է տեղափոխել մահացած վիճակում մի երիտասարդ տղայի:

Այս պահին ոստիկանները պարզում են, թե որտեղից են մահացածն ու վիրավորը տեղափոխվել հիվանդանոց:

Աղբյուրի տեղեկություններով՝ նրանք տեղափոխվել են Նոր Նորք վարչական շրջանի 4-րդ զանգվածի Բակունցի փողոցից: Ըստ տեղեկությունների՝ դեպքի վայրում հնչել են նաև կրակոցներ:

Քիչ առաջ աղբյուրը հայտնեց, որ ոստիկանները պարզել են դեպքի վայրը, որտեղ հայտնաբերել են իրար բախված Lexus և Opel մակնիշի ավտոմեքենաներ:

Lexus-ի կողքն էլ՝ դրսում, հայտնաբերվել են արնանման հետքեր: Այս պահին երթևեկությունը նշված հատվածում դադարեցվել է:

Ըստ նախնական տեղեկությունների՝ «Ծիածան» մարկետի դիմած անհայտ անձը կրակոցներ է արձակել Lexus մակնիշի 09 MՏ 090 համարանիշի ավտոմեքենայի ուղղությամբ, որից հետո դիմել է փախուստի, իսկ Lexus-ն էլ առաջ ընթանալով` բախվել է Ford Transit-ին, Օpel-ին և մեկ այլ Opel մակնիշի ավտոմեքենաներին: