Ով ոնց կարողացավ ինքնահաստատվեց, իսկ ինձ անգրագետ ասողներին… Բլոգեր Մագան զայրացած է

Սկանդալային միջադեպից հետո բլոգեր Մագան անդրադարձել է տվյալ թեմային՝ շնորհակալություն հայտնելով նրանց, ովքեր իրեն աջակցել են եւ հասկացել են, որ «Քաղցած սպասում են» հաղորդման ժամանակ ինքը ծաղրում  եւ հեգնում էր, ինչպես նաեւ շատ համբերատար էր:

Միաժամանակ, Մագան անդրադարձել է նրանց, ովքեր վատաբանել են իրեն.

«Ով ոնց պետք էր ինքնահաստատվեց: Խոսքս ուղղում եմ էն մարդկանց, ում առիթ էր պետք վատաբանելու: Հիմա բոլոր վատաբանողներին, հատկապես՝ այն տիկտոկերներին, որոնց թվում է… Եթե դու բավական հետ ես ամեն ինչով, էդտեղից խոսելը թվում է, թե հետեւից ես խոսում»:

Մագան նրանց խորհուրդ տվեց որակ տալ, իսկ ինքն իր մասին ասաց, որ Հայաստանում որպես տիկտոկեր առաջիններից է, իսկ նրանք, ովքեր իրեն անգրագետ են համարել, խոստացավ, որ կտեսնեն իր խելքը մեկ այլ հաղորդման մեջ:

Հիշեցնենք, որ Մագայի մասնակցությամբ հաղորդումը մեծ աղմուկ է բարձրացրել, ինչի վերաբերյալ Մագան Starnews-ին ասել է հետեւյալը.

«Հաղորդումը նայող մարդկանց մոտ կստեղծվի այն տպավորությունը, որը ուզել են՝ թողնեմ, սակայն ես էի ավելի շատ ծաղրում նրանց՝ պատասխանելով՝ չգիտեմ»:

Տվյալ թողարկումը բավական աղմկահարույց էր ստացվել,  քանի որ Մագան չէր կարողացել նախ պատասխանել, թե   ի՞նչ կլինի 7×6, ապա կատակելով ասել էր. «Աղյուսյակն ի՞նչ է»:

Նույն թողարկման ընթացքում Մագան չէր տարբերել Թումանյանին Չարենցից, ինչպես նաև ցույց էր տվել, որ չի տիրապետում ռուսերենին:

«Այն, որ նրանք չունեին տարրական քաղաքավարություն ու կուլտուրա, շեղվել էին իրենց ձևաչափից, փորձում էին խելքս ստուգել, իսկ ես հասկանում էի, որ մասնակցում եմ «Քաղցած սպասում» են հաղորդմանը, որ  սա «Ամենախելացին» հաղորդումը չէ, ի վերջո, կարող էի հրաժարվել այդ հարցերից, ինչը չարեցի, սակայն իմ դաստիարակությունը դա թույլ չտվեց, փորձել եմ նրանց լեզվով պատասխանել, զարմանում եմ հեռուստադիտողի վրա, որ չեն հասկացել, որ ծաղրել և հեգնել եմ: Սուրենը երկու տարուց  պապիկիս թայ է դառնալու, ու իր համար աննորմալ է, որ օրինակ՝ կարող եմ տանից հողաթափերով դուրս գալ, սակայն իմ հետևորդներն ինձ հասկանում են»,-նշել էր Մագան:

Սուրեն Շահվերդյանը  Starnews-ի հետ զրույցում անդրադարձել է  Մագայի մտքերին.

«Եթե Մագան հաշվել իմանար, կհասկանար, որ ես երկու տարի հետո իր պապիկի տարիքին չեմ կարող լինել, սա ևս մեկ անգամ ապացուցում է նրա մաթեմատիկական ունակությունների «թռիչքը»: Եվս մեկ ապացույց, որ նա  պրիմիտիվ հաշվել չգիտի: Հաղորդման ընթացքում պարզ երևացին նրա գիտելիքները: Նրա գործունեությունը վտանգավոր է երիտասարդների համար, քանի որ նա շատ դեռահասների համար օրինակ է: Շատ բլոգերներ, լինելով անհեթեթ և տգետ, վտանգ են ներկայացնում, քանի որ լուրջ քանակի հետևորդներ ունեն:  Ի դեպ, հաղորդման մեջ Մագան ասում է, որ Աստված չանի իր հետևորդները պակասեն, ինձ համար ցանկալի է, որ այդպես լինի, քանի որ  երիտասարդների խորհուրդ կտամ հետևել լուրջ մարդկանց, գրագետ մարդկանց, ովքեր կարող են օգուտ տալ հասարակությանը: Մագան վատ օրինակ է ծառայում: Մեր ցավը և դժբախտությունը գալիս են տգիտությունից, տգետների մի մեծ խումբ հայտնվել է մեր իշխանության մեջ, որոշում կայացնողների մեջ շատ են նրանք, մարդիկ, ովքեր պրոֆեսիոնալ չեն: Ինչ վերաբերում է Մագային, նա պրիմիտիվ գիտելիքներ չունի, դա ակնհայտ է, մի բան էլ հպարտանում է դրանով»: