SHAMSHYAN.com-ի տեղեկություններով՝ երեկ՝ հոկտեմբերի 4-ին, արտակարգ դեպք է տեղի ունեցել Շիրակի մարզում: Ժամը 16:30-ի սահմաններում ոստիկանության Կումայրիի բաժին ահազանգ է ստացվել, որ Գյումրի քաղաքի Ռուսթավելու փողոցի տներից մեկում պայթյուն է հնչել և բժիշկների հերթապահ խումբը, ժամանելով նշված վայր, հայտնաբերել է տղամարդու դի:
Դեպքի վայր են ժամանել ոստիկանության Շիրակի մարզային վարչության պետը, վարչության պետի օպերգծով տեղակալն ու ոստիկանության Կումայրիի բաժնի պետը,այս մասին հայտնում է Shamshyan.com-ը:
Ժամանել է նաև Հայաստանի քննչական կոմիտեի Շիրակի մարզային քննչական վաչության խումբը՝ հատկապես կարևոր գործերով ավագ քննիչ Գյոզալյանի գլխավորությամբ:
Ոստիկաններն ու քննիչները պարզել են, որ նույն փողոցի 91 տան բնակիչ, 29-ամյա Վահե Բ.-ն ննջասենյակում, դեռևս չպարզված հանգամանքներում, մահացել է պայթյունի հետևանքով: Դեպքի վայրի զննությամբ հայտնաբերվել է նռնակի պայթուցիչի օղակ և բռնակ:
Փաստի առթիվ քննչական բաժնում հարուցվել է քրեական գործ: Քննիչի որոշմամբ նշանակվել են պայթյունատեխնիկական և դատաբժշկական փորձաքննություններ:
Դեպքի վայր է ժամանել նաև Արտակարգ իրավիճակների նախարարության փրկարար ծառայության Շիրակի մարզային փրկարարական վարչության խումբը: Հաշվի առնելով դեպքի որոշ հանգամանքներ, ժամանել է նաև Շիրակի մարզի դատախազության դատախազ Մարտիրոսյանը:
Տեղի ունեցածը ինքնասպանություն է, դժբախտ պատահար, թե սպանություն, քննչակա բաժինը նույնպես պարզում է:
English
Русский
