31-ամյա կինը եւ իր անչափահաս երեխաները սպանվել են․ նրանց մարմինների վրա կան սուր կտրող-ծակող գործիքի հարվածի հետքեր

Շիրակի մարզի Արթիկ խոշորացված համայնքի Պեմզաշեն բնակավայրի տներից մեկում մահացած հայտնաբերված 31-ամյա կնոջ եւ նրա երկու անչափահաս երեխաների մարմինների վրա հայտնաբերվել են սուր կտրող-ծակող գործիքի հարվածի հետքեր։ Այս մասին NEWS.am-ի հետ զրույցում ասաց Քննչական կոմիտեի մամուլի խոսնակ Վարդան Թադեւոսյանը։

«Տեղի ունեցածը սպանություն է։ Նախաձեռնվել է քրեական վարույթ ՔՕ 155-րդ հոդվածի 1-ին մասով(սպանություն) եւ նույն հոդվածի 2-րդ մասի 5-րդ (անչափահասի սպանություն) կետերով»,- նշեց Թադեւոսյանը։

Հիշեցնենք, որ Պեմզաշենի տներից մեկում հայտնաբերվել է 31–ամյա կնոջ եւ երկու անչափահաս երեխայի դի։ 

«Ոստիկանությունը ժամը 13։45–ին ահազանգ է ստացել, որ 911 ծառայությունից հաղորդում են ստացել , որ Պեմզաշեն գյուղում կա փակ դուռ, մեկնել է օպերատիվ խումբ , նշված հասցեում հայտնաբերվել է 31–ամյա կնոջ եւ երկու անչափահաս երեխայի դի, եղել են նաեւ արնանման հետքեր։ Այս պահին օպերատիվ քննչական խումբը դեպքի վայրում է, կատարվում են համապատասխան գործողություններ»,– փոխանցեցին Ոստիկանության հասարակայնության հետ կապի եւ լրատվության վարչությունից։