Տաշիրում տեղի ունեցած ավտովթարի հետևանքով հայրն ու որդին մահացել են, մայրը ծայրահեղ ծանր վիճակում է

Այսօր՝ սեպտեմբերի 18-ին, խոշոր ավտովթար է տեղի ունեցել Լոռու մարզում: Ժամը 09:20-ի սահմաններում Տաշիր քաղաքի սկզբնամասում բախվել են «DAF» մակնիշի բեռնատարը, «Opel» և «ՎԱԶ 2109» մակնիշի ավտոմեքենաները:

Ինչպես դեպքի վայրից հայտնում է ֆոտոլրագրող Գագիկ Շամշյանը, վթարի հետևանքով 3 հոգի ծայրահեղ ծանր ախտորոշմամբ տեղափոխվել են «Տաշիր» բժշկական կենտրոն:  

Վիրավորներին առաջինը օգնության են հասել քաղաքացիները, ապա օպերատիվորեն ժամանած ՀՀ ներքին գործերի նախարարության փրկարար ծառայության Տաշիրի հրշեջ-փրկարարական ջոկատի փրկարրաները՝ օգտագործելով հատուկ տեխնիկա:  

Վիրավորներից մի քանիսին ավտոմեքեներից դուրս են բերել փրկարարները:  

Օպերատիվ է գործել «Տաշիր» բժշկական կենտրոնի շտապօգնության բժիշկների հերթապահ խումբը:  

Մինչ դեպքի վայր կժամաներ քննչական խումբը՝ հիվանդանոցից ահազանգ է ստացվում, որ վիրավորներից 2-ը, գիտակցության չգալով, մահացել են:

Գ. Շամշյանի տեղեկություններով՝ մահացածները հայր ու որդի են, վիրավորն էլ վարորդի կինն է:

Ֆոտոլրագրողը հայտնում է, որ տեղում պարզվել է, որ ավտոմեքենաներից մեկն էլ խփել է խոշոր եղջերավոր անասունի, որը անկել է:

Պարզվում է նաև խոշոր եղջերավոր անասունի տիրոջ ինքնությունը:

Գ. Շամշյանի տեղեկություններով՝ «Opel»-ը եղել է կայանված, երբ «DAF»-ը, որպեսզի չհարվածի խոշոր եղջերավոր անասունին, փորձել է փախցնել, սակայն չի ստացվել, հարվածել է կովին, ապա «Opel»-ին, ինչից հետո «Opel»-ը հայտնվել է ճանապարհի երթևեկելի գոտուց դուրս: