Պարզվել է երեկվա ովբերգական վրաերթ կատարած վարորդի և մահացած հետիոտնի ինքնությունը․ Տեսանյութ

SHAMSHYAN.com-ի տեղեկություններով՝ ոստիկանության Գեղարքունիքի մարզային վարչության, ոստիկանության Սևանի բաժնի և Հայաստանի քննչական կոմիտեի Գեղարքունիքի մարզային քննչական վարչության Սևանի քննչական բաժնի քննիչները պարզել են երեկ՝ սեպտեմբերի 8–ին, Գեղարքունիքի մարզում վրաերթի հետևանքով մահացած հետիոտնի և վրաերթ կատարած վարորդի ինքնությունը:

Ինչպես հայտնում է ֆոտոլրագրող Գագիկ Շամշյանը,  պարզվել է՝ վարորդը եղել է Երևանի բնակիչ, 23-ամյա Մարտին Ս.-ն, իսկ վրաերթի ենթարկվածը՝ Գեղարքունիքի մարզի բնակիչ, 75-ամյա Սիրանուշ Խ.-ն: Վարորդը ենթարկվել է սթափության փորձաքննության, նա եղել է սթափ:​Ինչպես ավելի վաղ դեպքի վայրից հայտնել էր ֆոտոլրագրողը, սեպտեմբերի 8-ին մահվան ելքով վրաերթ էր տեղի ունեցել Գեղարքունիքի մարզում: Ժամը 18:40–ի սահմաններում Honda Accord մակնիշի ավտոմեքենան Երևան-Սևան-Իջևան ավտոճանապարհի 56-րդ կմ հատվածում վրաերթի է ենթարկել կին հետիոտնի:

Վարորդը փախուստի չէր դիմել, փորձել էր օգնություն ցուցաբերել վրաերթի ենթարկվածին, ահազանգել է հիվանդանոց և օպերատիվորեն  ժամանած Սևանի հիվանդանոցի բժիշկների հերթապահ խումբը արձանագրել է  հետիոտնի մահը: Դեպքի վայր էին ժամանել ոստիկանության Գեղարքունիքի մարզային վարչության պետ Արթուր Մկրտչյանը, ոստիկանության Սևանի բաժնի պետ Սուրիկ Ջանիկյանը:

Վարորդը ոստիկանության Սևանի բաժնի քրեական հետախուզության բաժանմունքի պետ Կարեն Ավետիսյանի ուղեկցությամբ տեղափոխվել էր ոստիկանության Սևանի բաժին: