Ուժգին կարկուտի ավերածությունները Հայաստանում․ Տեսանյութ

Այսօր ժամը 17:30-ի սահմաններում ուժեղ կարկուտ է տեղացել Շիրակի մարզում: Մոտ կես ժամ տեղացած կարկուտը մեծ վնասներ է հասցրել Արթիկի տարածաշրջանի 15 գյուղերի  ցանքատարածքներին: SHANTNEWS.am-ի թղթակցի հետ զրույցում Շիրակի մարզպետարանի գյուղատնտեսության և բնապահպանության վարչության պետ Ռոման Համայակյանը հայտնել է, որ ահազանգեր են ստացել Արթիկի ու Ախուրյանի համայնքապետարաններից, վարչական ղեկավարներից, որոնք տեղեկացրել են, որ բերքի հիմնական մասը տուժել է:

«Հիմնականում տուժել են Արթիկի տարածաշրջանի Հոռոմ, Լուսակերտ, Լեռնակերտ, Սարատակ, Հայրենյաց, Տուֆաշեն,Պեմզաշեն և Ախուրյանի տարածաշրջանի Գետք, Բենիամին գյուղերի ցանքատարածքները :Համայնքների մեծ մասում հացքաղն արդեն ավարտվել  էր, ըստ համայնքների վարչական ղեկավարների, հացահատիկային ցանքատարածքներում վնասը քիչ է, հիմնականում կարկտահարվել են կարտոֆիլի, սեղանի ճակնդեղի ցանքերն ու բանջարաբոստանային մշակաբույսերը, մրգատու այգիները: Դեռ հստակ վնասի կամ վնասված տարածքների չափ նշել չեմ կարող, համայնքային ու մարզային հանձնաժողովները վաղվանից կաշխատեն գյուղերում ու կգույքագրեն վնասի չափը»,- ասել է Ռոման Համայակյանը:

Ըստ վարչության պետի, կարկուտի  հասցրած վնասները նկատելի կդառնան 2-3 օրից, որոշ տեղերում արդեն գյուղացիները նախնական դիտարկումներ կատարել են, համայնքներից ստացված վերջնական ամփոփ տվյալներով հնարավոր կդառնա միայն գնահատել կարկտահարության վնասի չափը: Նշենք, որ այս տարի մարզում դեռ նման խոշոր կարկտահարություն չէր գրանցվել:

Լուսանկարները և տեսանյութը՝ Աննա Վարդանյանի ֆեյսբուքյան էջից։