«Ցանկության պակասն է գրել հայատառ ու ներկայանալ որպես հայ, որովհետև, եթե ես չեմ գրում հայատառ, խուսափում եմ դրանից, փորձում եմ կոծկել իմ թերությունները և առաջ գնալու որպես հայ միտում չունեմ, ինչի՞ս է պետք հայ անունը:
Դա վայել չէ մարդուն, ով փորձում է իր թերություննները կոծկելու համար օգտագործել տարբեր բաներ: Պետք է կարողանաս հարգել քո տեսակը, քո հայ լինելը, այբուբենը: Ո՞նց կարելի է այբուբենը դեն նետել ու որոշել, որ լատինատառ հեշտ է գրելը: Չեմ հասկանում ու չեմ հարգում: Ինչ ուզում են ասեն՝ չեմ ընկալում»,- Yelaket-ի եթերում՝ անդրադառնալով հայատառ գրելու խնդրին ասել է հաղորդավար Անի Զաքարյանը:
Նա նաև անդրադարձել է հայրենիքը լքելու թեմային: Tert.am Life‑ը առանձնացրել է հաղորդումից մի հատված:
«Ես իմ մտերիմ ընկերուհուն անգամ չկարողացա համոզել, որ նա մնա Հայաստանում, թեև ամեն ինչով ապահովված էր: Ես Մոսկվայում ապրել եմ 1 տարի բավականին հասուն տարիքում, հետո վերադարձել եմ, որովհետև ես հոգով ու սրտով Հայաստանին եմ պատկանում: Անգամ այստեղ, չունենալով սեփական տուն, մեքենա, որևէ նախապայման, որ քեզ կարող է բարեկեցիկ կյանքի բերել, չեմ ունեցել, բայց ես վերադարձել եմ Հայաստան: Մաքառելով, ջանք թափելով, իմ աշխատասիրությունն ու գրաֆիկը ճիշտ դասավորելով փորձել եմ հասնել այնպիսի կետի, որտեղ ինձ և՛ բարոյապես, և՛ ֆինանսապես ապահով կզգամ:
Կապ չունի որտեղ ես գտնվում, ինչո՞ւ նույն աշխատանքը չես անում այստեղ օգուտը քո հայրենիքին տալու համար, Հայաստանը պահպանելու ու զարգացնելու համար»,- ասել է Անի Զաքարյանը:
English
Русский
