Ողբերգական վթարի հետևանքով կյանքից հեռացել է նաև «Համշեն տուր»-ի զբոսավարը

NEWS.am-ի տեղեկություններով՝ Երեւան-Գյումրի ավտոճանապարհի ողբերգական վթարի հետեւանքով զոհվածների թվում է նաեւ «Համշեն տուր»-ի զբոսավարը։

Նշենք, որ Քննչական կոմիտեն դեռեւս չի հրապարակում զոհված 11 քաղաքացիների անունները։

Հիշեցնենք, որ այսօր՝ օգոստոսի 14-ի գիշերը, Երեւան-Գյումրի ավտոճանապարհին՝ Լանջիկ գյուղի մոտակայքում տեղի է ունեցել ողբերգական ավտովթար։ Երեւան-Գյումրի ավտոճանապարհի 90-րդ կմ-ին բախվել են «Volkswagen» մակնիշի ուղեւորափոխադրող միկրոավտոբուսը եւ «ZIL» մակնիշի բեռնատարը։ Զոհվել է 11 քաղաքացի, ծանր վիրավորել՝ 6-ը։ Տուժածներից 5-ը վերակենդանացման բաժանմունքում են, նրանցից 4-ի առողջական վիճակը ծանր է, մեկինը` ծայրահեղ ծանր:

Ողբերգական վթարի ուղեւորները վերադառնում էին Արեւմտյան Հայաստան ուղեւորությունից։

Նախաձեռնվել է քրեական վարույթ ՀՀ քրեական օրենսգրքի 342-րդ հոդվածի 3-րդ մասի հատկանիշներով (Ճանապարհային երթեւեկության անվտանգության ապահովմանն ուղղված պահանջները կամ ճանապարհային երթեւեկության կամ տրանսպորտային միջոցների շահագործման անվտանգությունն ապահովող կանոնները խախտելը)։

ArmLur.am-ը գրել էր, որ խումբը վերադառնում էր Արևմտյան Հայաստանից։