Ողբերգական ավտովթար է տեղի ունեցել Արարատի մարզում

Այսօր՝ օգոստոսի 17-ին, ողբերգական ավտովթար է տեղի ունեցել Արարատի մարզում։

Ժամը 20:20-ի սահմաններում Mercedes մակնիշի ավտոմեքենան Դաշտաքար-Ուրցաձոր ավտոճանապարհին, դեռևս անհայտ հանգամանքներում, դուրս է եկել ճանապարհի երթևեկելի գոտուց և մխրճվել երկաթե արգելապատնեշի մեջ:

Ինչպես դեպքի վայրից հայտնում է ֆոտոլրագրող Գագիկ Շամշյանը, վթարի հետևանքով 2 հոգի ծայրահեղ ծանր ախտորոշմամբ տեղափոխվել են հիվանդանոց։

Վիրավորներին առաջինն օգնության են հասել քաղաքացիները, օպերատիվորեն ժամանած Վեդիի բժշկական կենտրոնի շտապօգնության բժիշկների հերթապահ խումբը ու ՀՀ Ներքին գործերի նախարարության Փրկարար ծառայության Արարատի հրշեջ-փրկարարական ջոկատի հրշեջ-փրկարարները։

Բժիշկները վիրավորներին մինչև հիվանդանոց տեղափոխելը տեղում առաջին բուժօգնություն են ցուցաբերել։ 

Մինչ դեպքի վայրում աշխատում էր քննչական խումբը, հիվանդանոցից ահազանգ է ստացվել ոստիկանության Արարատի բաժին, որ վիրավորներից մեկը գիտակցության չգալով մահացել է, իսկ մյուս վիրավորին տեղափոխում են Երևանի հիվանդանոցներից մեկը։

Դեպքի փաստով Վեդիի քննչական բաժնում նախաձեռնվել է քրեական վարույթ։ Քննիչի հանձնարարականով ավտոմեքենան տեղափոխվում է ոստիկանության Արարատի բաժնի պահպանվող հատուկ տարածք։

Դեպքի վայրում տարիքով մի տղամարդ հայտնում էր, որ վարորդն ինքն է եղել, սակայն ոստիկաններն ու քննիչները ունեն կասկածներ, որ վարորդը նա չէ, այլ մեկ այլ երիտասարդ, ով հայտնում էր, որ ինքը եղել է ավտոմեքենայի մեջ։

Գ. Շամշյանի տեղեկություններով մահացածը Այգավան գյուղի բնակիչ 34-ամյա Հարություն Պետրոսյանն է, իսկ վիրավորը նրա հարազատ եղբայրը՝ 35-ամյա Կարեն Պետրոսյանը։