Չշփվող էր, բնակվում էր մի կնոջ հետ. նոր մանրամասներ` Խաչփարում սպանվածի մասին

Արարատի մարզում դաժանորեն սպանված 44-ամյա Վարդան Ա.-ի սպանության պաճառները դեռ անհայտ են։ Oragir.News-ը կապ հաստատեց Արարատի մարզի Խաչփար գյուղի վարչական ղեկավար Արայիկ Գաբրիելյանի հետ։ Վարչական ղեկավարի խոսքերով` սպանված տղամարդը 2 տարի է, ինչ բնակվում էր իրենց գյուղում, բայց թե որտեղից էր, ինքը տեղյակ չէ։

«Չշփվող մարդ էր, այդ իսկ պաճառով նրա հետ շփում գրեթե չենք ունեցել։ Հարևանները ասում էին, որ մի կնոջ հետ էր բնակվում։ Բայց ասում են, որ ամուսնացած եղել է։ Ապրում էին գյուղի վերջում։ Ջերմոցում են աշխատել։ Վերջին տեղեկություններով՝ դուրս շատ չեն եկել տարածքից։

Կարծես մեկուսացած լինեին»,-ասաց Խաչփարի վարչական ղեկավարը։

Թե ով է նրան սպանված հայտնաբերել, Արայիկ Գաբրիելյանը դժվարացավ պատասխանել, միայն ասաց, որ նրա տանն են գտել մահացած, շտապօգնություն են կանչել, բայց չգիտի, թե ով, քանի որ իրեն էլ են ոստիկանությունից տեղեկացրել, որից հետո գնացել է դեպքի վայր։

Հիշեցնենք,որ հոկտեմբերի 24-ին, առանձնակի դաժանությամբ սպանություն է տեղի ունեցել Արարատի մարզում: Ժամը 12:00-ի սահմաններում ՀՀ ներքին գործերի նախարարության ոստիկանության Արարատի մարզային վարչությունում և ոստիկանության Մասիսի բաժնում օպերատիվ տեղեկություններ են ստացվել, որ Խաչփար գյուղի տներից մեկում տղամարդու դի կա:

Մինչ ոստիկանները կհասնեին դեպքի վայր, «Մասիս» բժշկական կենտրոնից ոստիկանության Մասիսի բաժին ահազանգ է ստացվում, որ Մասիսի շտապօգնության կայանից բժիշկների հերթապահ խումբը մեկնել է Խաչփար գյուղի 22-րդ տուն, որտեղ դռան մոտ՝ ներսի հատվածում, հայտնաբերել են արնաշաղախ տղամարդու մարմին:

Արդեն տեղում ոստիկանները պարզել են, որ մահացածը նշված գյուղի բնակիչ 44–ամյա Վարդան Ա.-ն է, ում պարանոցի հատվածում դատաբժիշկը հայտնաբերել է խոհանոցային դանակը, մարմնի վրա էլ՝ սուր կտրող-ծակող առարկային հարվածի մի քանի հետքեր:  

Տեղում պարզվել է նաև, որ 46-ամյա կինը բժիշկներին հայտնել է, որ տղամարդը ինքնասպանություն է գործել, սակայն Արարատի մարզի ոստիկաններն ու քննիչները տաք հետքերով պարզում են, որ տեղի ունեցածը սպանություն է, և կասկածյալ կնոջը սպանություն կատարելու կասկածանքով տեղափոխում են ոստիկանության Մասիսի բաժին: