Այսօր՝ հուլիսի 2-ին, ողբերգական ավտովթար է տեղի ունեցել Կոտայքի մարզում: Ժամը 08:40-ի սահմաններում Երևան-Սևան ավտոճանապարհի Աբովյանի վարչական տարածքում «Mercedes» մակնիշի ավտոմեքենան դեպի Սևան ընթանալիս հայտնվել է անձրևաջրերի հետևանքով ճանապարհին առաջացած ջրափոսում, ապա առաջ ընթացել, բախվել պաշտպանիչ բետոնե հենապատին ու հայտնվել ճանապարհի երթևեկելի գոտում:
Ինչպես դեպքի վայրից հայտնում է ֆոտոլրագրող Գագիկ Շամշյանը, վթարի հետևանքով 1 հոգի տեղում մահացել է, 3 հոգի մարմնական վնասվածքներով տեղափոխվել են «Աբովյան» բժշկական կենտրոն:
Վիրավորներին առաջինը օգնության են հասել քաղաքացիները, պարեկային ծառայության Կոտայքի մարզի գումարտակի պարեկները և «Աբովյան» բժշկական կենտրոնի շտապօգնության բժիշկների հերթապահ խմբերը:
Վիրավորներից մեկին հիվանդանոց են տեղափոխել պարեկները՝ իրենց ծառայողական ավտոմեքենայով:
Ոստիկանությունն ու քննչական բաժինը պարզում են վարորդի, մահացածի և վիրավորների ինքնությունը:
Քննիչի հանձնարարականով՝ ավտոմեքենան տեղափոխվում է ոստիկանության Աբովյանի բաժնի պատհպանվող հատուկ տարածք:
ֆոտոլրագրողը հայտում է, որ նշված հատվածում տարիներ շարունակ ճանապարհի անհարթ լինելու պատճառով, երբ անձրև է լինում, անձրևաջրերը կուտակվում են ու վարորդները հայտնվում են այդ ջրափոսում և տեղի է ունենում վթար, այդ թվում՝ ողբերգական:
Նմանատիպ վթարներից հետո պատկան մարմինները, այդ թվում՝ ճանապարհը սպասարկող ճանշինը խոստանում են, որ խնդիրը կլուծեն, սակայն մինչև այժմ ոչ մի դրական արդյունք:
English
Русский
