ՀՀ քաղաքաշինության, տեխնիկական եւ հրդեհային անվտանգության տեսչական մարմինը, ինչպես հայտնի է, «Մալաթիա» տոնավաճառի գործունեությունը առաջիկայում կասեցնելու որոշում է կայացրել, ինչը մեծ իրարանցում է առաջացրել տոնավաճառում։ Խոսվում է, որ ՀՀ քաղաքաշինության, տեխնիկական եւ հրդեհային անվտանգության տեսչական մարմինը տևական ժամանակ առաջ է խախտումներ արձանագրել, ժամանակ տրամադրել դրանք վերացնելու համար, սակայն արձանագրված խախտումները վերացված չեն։
«Ո՞վ իրավունք ունի իմ աշխատանքը իմ ձեռքից խլի։ Մենք հացի փող ենք վաստակում ընդամենը, ապրում։ Այսօր էդ ո՞վ կհամաձայնվի, որ իրեն պարզապես վերցնեն ու գցեց փողոց։ Ո՞նց են կերակրելու էս ժողովրդին, որ փակեցին շուկան։ Սովետական տարիներին մարդկանց թոշակը կազմում էր մոտավորապես 100-120 ռուբլի, որով մարդիկ կարողանում էին անգամ 4-5 հոգանոց ընտանիք պահել։
Հիմա իմ թոշակը կազմում է 49 հազար դրամ, ո՞նց ապրեմ, դե ասեք։ Ինչ-որ մեկը եկել է, միլիոններ է տակը դնում ու որոշել են, որ էս տոնավաճառը պիտի փակվի, հա՞»,- զայրացած ասաց տոնավաճառի աշխատակիցներից մեկը։
«30 տարի էս տոնավաճառի ոչ մի բան չի պատահել ու հանկարծ ինքը եկավ ու որոշեց, որ պատահելու է։ Այսինքն ինքը ի՞նչ է անելու, գիշերով դիվերսիա է անելու, գա այստեղ վառի, հա՞։ Այո, հենց տենց։ Եթե հանկարծ այս որոշումը սկսեն օգտագործել, դա կնշանակի դիվերսիա մեր տոնավաճառի նկատմամբ։
Եթե իրոք նման որոշում կայացնեն, դա կնշանակի, որ դիվերսիա է ոչ միայն տոնավաճառի, այլ ողջ էս ժողովրդի նկամամբ, որին փաստորեն ուզում են դուրս հանել»,- հավելեց նա։
English
Русский
