Կարեն Բաղջյանը մահացել է ոչ թե ավտովթարից, այլ բուժաշխատողի պատճառով

Այն, որ վերջին տարիներին ՀՀ Քննչական կոմիտեն և մարզային քննչական վարչություններն ու բաժինները աշխատում են գերծանրաբեռնված ռեժիմով, գաղտնիք չէ։ Ուրախալի է նաև այն փաստը, որ քննչական աշխատանքի շնորհիվ բացահայտվել են բազմաթիվ աղմկահարույց հանցագործություններ, այդ թվում՝ առանձնապես ծանր։ Եղել են նաև դեպքեր, որ քննչական գործողությունների արդյունքում բացահայտվել են իրական հանցագործության մեղավորները։

SHAMSHYAN.com-ը հունվարի 15-ին տեղեկություն էր հրապարակել Երևան-Երասխ ավտոճանապարհի 11-րդ կմ հատվածում տեղի ունեցած ավտովթարի փաստով։ ՀՀ Քննչական կոմիտեի Արարատի մարզային քննչական վարչությունում դեպքի փաստով նախաձեռնվում է քրեական վարույթ, որի շրջանակում էլ պարզվում է, որ «Hyundai Elantra» մակնիշի ավտոմեքենան վարել է Արարատի մարզի բնակիչ, Արարատի համայնքապետարանի առաջատար մասնագետ 27-ամյա Դիանա Նազարյանը։ Վթարի հետևանքով վերջինիս ուղևոր, Արարատի մարզի բնակիչ 51-ամյա Կարեն Բաղջյանը մարմնական վնասվածքներով տեղափոխվել էր «Արտաշատ» բժշկական կենտրոն, որտեղից էլ հունվարի 26-ին վիրավորը տեղափոխվել է Երևանի «Սուրբ Գրիգոր Լուսավորիչ» բժշկական կենտրոն, որտեղ հունվարի 26-ին մահացել է։

Նշված դեպքի փաստով քննչական գործողությունների արդյունքում, ինչպես նաև մի շարք փորձաքննություններ կատարելուց հետո, պարզվում է, որ Կ․ Բաղջյանի մահը վրա է հասել ոչ թե տեղի ունեցած ավտովթարից հետո ստացած աջ բազոսկրի  բուժմիջամտության ենթարկված բազմաբեկոր կոտրվածքի հետևանքով, այլ գլխուղեղի հեմոդինամիկ-անօքսիկ վնասումից առաջացած գլխուղեղի խիստ արտահայտված այտուցից, նեկրոզից, այսինքն բուժաշխատողի կողմից մասնագիտական պարտականությունները չկատարելու կամ ոչ պատշաճ կատարելու արդյունքում։ Այս դեպքը հերթական անգամ ապացուցում է, որ քննչական ճիշտ, գրագետ և հսկայածավալ աշխատանքի արդյունքում իրականությունը «ջրի երես է դուրս գալիս» և դա առաջին դեպքը չէ, երբ ՀՀ Քննչական կոմիտեի Արարատի մարզային քննչական վարչության և նույն վարչության Վեդիի, Մասիսի քննիչները ցուցաբերում են պրոֆեսիոնալիզմ և բացահայտում են իրական հանցագործներին։ Նշված դեպքերից մի քանիսին SHAMSHYAN.com-ը անդրադարձել էր։

Ինչպես ավելի վաղ հայտնել էր SHAMSHYAN.com-ը, հունվարի 15-ին ավտովթար էր տեղի ուենցել Արարատի մարզում։ Ժամը 18։20-ի սահմաններում Արարատի մարզի բնակիչ 27-ամյա Դիանա Ն․-ն իր վարած Hyundai Elantra  մակնիշի ավտոմեքենայով Երևան-Երասխ ավտոճանապարհին՝ «Ադանա» ռեստորանային համալիրի մոտ բախվել էր ռեստորանի պատին և հայտնվել ռեստորանի տարածքում։

Վարորդը ենթարկվել էր սթափության փորձաքննության, եղել էր սթափ։