Ինչպես է թմրամիջոցն ու զենքը հայտնվել Հայաստանում՝ շրջանցելով մաքսային ստուգման կետը (տեսանյութ)

ՀՀ Ազգային անվտանգության ծառայությունն այսօր հայտնեց, որ Իրանից մաքսանենգ ճանապարհով Հայաստանի տարածք առանձնապես խոշոր չափերի թմրամիջոց, ինչպես նաև զենք, զինամթերք տեղափոխելու դեպք է կանխվել։

Բացահայտումն իրականացվել է Սյունիքի մարզային վարչության աշխատակիցների և Հայաստանում Ռուսաստանի Դաշնության անվտանգության դաշնային ծառայության սահմանապահ վարչության «Մեղրի» ջոկատի ծառայողների հետ միասին։

Պարզվել է, որ մայիսի 18-ին ՀՀ քաղաքացին հայ-իրանական պետական սահմանի Մեղրի քաղաքի հարակից տեղանքում, ինքնությունը դեռևս չպարզաբանված ԻԻՀ քաղաքացու կողմից նշված վայրում, վերցրել է նրա կողմից մաքսանենգ ճանապարհով ՀՀ առաքված թմրամիջոցների խմբաքանակը, զենքը և զինամթերքը, այն թաքցրել է հայ-իրանական պետական սահմանի սահմանային շերտի մոտակայքում և հեռացել։ Հաջորդ օրը ներգրավելով ՀՀ ևս 2 քաղաքացու՝ ուղղորդել է գնալ և թաքստոցից վերցնել թմրամիջոցների խմբաքանակը, զենքը, զինամթերքը և տեղափոխել Քաջարան։ Իրավապահները Մեղրի քաղաքի մոտակայքում ավտոմեքենան կանգնեցրել են և ձերբակալել ՀՀ երեք քաղաքացիներին։

Ավտոմեքենայում հայտնաբերվել են 10 կիլոգրամը գերազանցող ընդհանուր քաշով՝ «հերոին», «մեթամֆետամին» և «մարիխուանա» տեսակի թմրամիջոցների զանգվածներով լցված 20 տարբեր փաթեթներ, ինչպես նաև 2 հատ մարտական ատրճանակ՝ 20 փամփուշտներով։ Դեպքի առթիվ նախաձեռնվել է քրեական վարույթ։

Սա մաքսային հսկողության կետերը շրջանցելով արգելված բեռների տեղափոխման միակ դեպքը չէ։ Նմանատիպ սխեմայի գործելու հավանականության մասին մայիսի 18-ին լրագրողների հետ զրույցում նշել էր ՊԵԿ նախագահ Ռուստամ Բադասյանը՝ անդրադառնալով ՀՀ 1 տոննա կոկաին ներկրելու դեպքին։

«Թմրանյութերը հայտնվում են շուկաներում՝ անցնելով մաքային կետեր կամ շրջանցելով մաքսային հսկողության գոտիները։ Այսինքն՝ անպայման չէ, որ մաքսային հսկողության գոտիով մաքսանենգ ապրանքը մտնի»,- ասել էր Բադասյանը։

ՊԵԿ նախագահը նաև մաքսային հսկողության գոտիները շրջանցելու կիրառվող տարբերակ էր մատնանշել․ «Օրինակ` Իրանի հետ սահմանում գետի վրայով նետում են թմրանյութը կամ դրոնով տեղափոխում են և գցում այնպիսի տեղում, որտեղից իրենց հանցակիցները կարող են վերցնել դա»։ Ստացվում է՝ ԱԱԾ-ի կողմից այսօր տարածված հաղորդագրությունը վերաբերում է ՊԵԿ նախագահի հիշատակած այս սխեմայով իրականացված մաքսանենգությանը։

Ինչ վերաբերում է ԱԱԾ-ի կողմից մայիսի 17-ին հայտնաբերված 1 տոննա կոկաինի դեպքին, որն Էկվադորից տարանցիկ երկրներով փորձ է արվել տեղափոխել Հայաստան, այս մասին հաղորդագրություն է տարածել ԱԱԾ-ն, ոչ թե Պետական եկամուտների կոմիտեն։

Այսպիսով, կարելի է ենթադրել, որ սա ևս փորձ է արվել Հայաստան հասցնել ոչ թե մաքսակետերով, այլ շրջանցելով մաքսային հսկողության կետերը և հայտնվելով ԱԱԾ-ի ու սահմանապահների ուշադրության կենտրոնում։